عبدالهی اميري چې شاوخوا ۱۸ کاله وړاندې د يو کډوال په توګه اسټراليا ته راغلی.
ښاغلي ژمنه کړې ترڅو د کويډ۱۹ وبا تر پايه به د سيدني ښار تر ټولو لوی روغتون (ويسټميډ) بيړنۍ څانګې ډاکټرانو او نرسانو ته وړيا پيزا ورکوي.
دا يو بې ساری ګام دی چې پدې سخت وخت کې د يو کډوال لخوا اخيستل کيږي.
ښاغلی اميري وايي، ټولو روغتيا برخې کار کوونکو سره پدې سخت وخت کې مرسته يو انساني کار دی.
ښاغلی اميري په کال ۲۰۰۲ کې اسټراليا ته راغلی او دا مهال يو فاميلي پيزې او کبابو رستورانت چې د ( Sopranos Gourmet Pizza) په نامه ياديږي مخې ته وړي.
سره لدې چې د کرونا ويروس وبا له وجې د ښاغلي کاروبار کې ۳۰ سلنه کمی راغلی ولې بيا يې هم اوسني کړکيچ دوران کې د روغتيا برخې کار کوونکو لاس ونيوه او ژمنه يې وکړه ترڅو د وبا تر پايه به ټولو کار کوونکو ته وړيا پيزا روغتون ته وړي.
د ښاغلي اميري په وينا، د ياد روغتون ډيري کار کوونکي دده مشتريان ول ولې د وبا راتګ وروسته له هغوی څخه يې احوال نه درلود ځکه ډيرو کار کوونکو بيړني خدمتو رسولو لپاره ډير ساعتونه کار کول پيل کړل او سختو شرايطو له مخه له روغتون څخه په اسانۍ بهر نه وځي.
کله چې لومړي ځل لپاره ښاغلي اميري ډاکټرانو او نرسانو ته روغتون ته پيږه وړله د روغتون بيړنۍ څانګې مشره بهر راووتله او له ښاغلي اميري څخه يې مننه وکړه.
"ډير د خوښی ځای وه چې له پيزې وړلو وروسته مې د بيړنۍ څانګې ډاکټرانو او کار کوونکو پر مخ خندا وليده."
دا مهال د اسټراليا ډيرو روغتونو کې ډاکټران او کار کوونکي ۱۴ او ۱۶ ساعته کار کوي.
"دا داسې ده لکه هغوی چې په جګړه کې وي او د جګړې لومړۍ کرښه کې دي، همدا ډاکټران او کار کوونکي له مونږ ډير د کرونا ويروس له خطر سره مخ دي."
Abdul Amiri delivering pizza to Westmead hospital health workers. Source: Supplied
ښاغلی اميري وايي، د کرونا ويروس وبا تر پايه به ډاکټرانو او نرسانو ته وړيا پيزا رسوي او پر نورو هم غږ کوي چې پدې سخت وخت کې دې د بې وزلو لاس ونيسي او که حتی مرسته هم نشي کولی نو بيا دې خلک کورونو کې پاتې شي ترڅو د ډاکټرانو، نرسانو او نورو ژوند وژغورل شي.
