د کرونا ویروس په ټوله نړۍ کې په تېزوالي سره د خپرېدو په حال کې ده. له چین هېواد څخه بهر تر ټولو زیاتو کسانو په ایران کې د کرونا ویروس له امله خپل ژوند له لاسه ورکړی دی. د ایران د روغتیا مرستیال وزير په ګډون تر اوسه پورې شاوخوا ۱۰۰ کسان په کرونا ویروس اخته شوي او ۱۶ کسانو خپل ژوند له لاسه ورکړی دی.
په یوې خپرې شوې ویډیو کې لیدل کېږي چې د ایران د روغتیا وزارت مرستیال، ایرج هریرچي د دوشنبې په ورځ د یوه خبري کنفرانس پر مهال څو ځله په دسمال د خپلې تندې خولې وچوي.
تېره ورځ د ایران د روغتیا وزارت یوه ویاند، د دغه هېواد له دولتي تلویزیون سره د خبرو پر مهال دا خبره منلې چې ایرج هریرچي هم په کرونا ویروس اخته شوی.
په یوې خپرې شوې ویډیو کې ښاغلي ایرج هریرچي ویلي "زه هم په کورونا ویرس اخته شوی یم"
نوموړي ایرانیانو ته خبرداری ورکړی ترڅو احتیاط وکړي ځکه د کرونا ناروغي تبعیض نه کوي او هر څوک په دغه ناورغۍ اخته کېدای شي.
همدا شان د ایران د پارلمان یوه غړي، محمود صادقي هم پر خپله ټویټر پاڼه لیکلي چې په کرونا ویروس اخته شوی او د ژوندي پاتې کېدوډېر امید نلري.
د ایران د روغتیا وزارت منلې چې ۳۴ نوي کسان په دغه هېواد کې په کرونا ویروس اخته شوي او په یادې ناروغۍ د اخته کسانو شمېر ۹۵ کسانو ته رسیدلی. له همدې امله د ایران یو شمېر ګاونډیو هېوادونو له دغه هېواد سره خپلې پولې تړلي دي.
څو ورځې وړاندې د افغانستان د روغتیا وزارت هم اعلان وکړ چې د دغه هېواد په هرات ولایت کې د کرونا ویروس یوه پېښه ثبت شوې. د افغانستان د روغتیا وزیر، فیروزالدین فیروز له رسنیو سره په خبرو کې ویلي چې په کرونا ویروس اخته کس د ایران له قم ښار څخه افغانستان ته بېرته راستون شوی.
A customer talks with a Pharmacist at a drugstore in downtown Tehran, Iran. Source: AAP
