د ایران دولتي رسنیو په اصفهان کې د چاودنو خبر ورکړی دی، په داسې حال کې چې د امریکا اې بي سي نیوز شبکې د یو امریکایي چارواکي په حواله راپور ورکړی چې د ایران په یوه سیمه کې اسراییلي توغندي لګیدلي دي.
دغه راپورونه پر اسراییلو د ایران له برید څو ورځې وروسته خپاره شوي دي.
د ایران دولتي رسنیو په اصفهان کې د چاودنو د خبر ترڅنګ د دغه هېواد په یو شمېر ښارونو کې د هوايي د فاعي سیسټم د فعالېدو په اړه هم خبر ورکړی دی.
د ایران د فضايي ادارې ویاند حسین دلیریان ویلي، څو بې پیلوټه الوتکې "په بریالیتوب سره رانسکورې شوې دي".
دلیریان پر خپله اکس پاڼه لیکلي چې "د اوس لپاره د توغندي د برید راپور نشته."
ایران د تېرې شنبې (د اپریل په ۱۳مه نېټه) په اسراییلو له ۳۰۰ د زیاتو مزایلونو او بې بېلوټه الوتکو بریدونه ترسره کړل. له دغو بریدونو وروسته اسراییلو خبرداری ورکړی و چې برید ته به ځواب ورکړي.
د اسراییلو پوځ فرانس پریس اژانس ته ویلي: "موږ دا مهال تبصره نه لرو."
د تهران د امام خمیني نړیوال هوايي ډګر (IKA) مسافرو ته ویل شوي چې ټولې الوتنې لغوه شوي او باید له هوايي ډګر څخه ووځي.
د رویټرز خبري آژانس راپور ورکړی چې د تهران ترڅنګ د شیراز او اصفهان هوايي ډګرونه هم تړل شوي دي.
