په نیو ساوت وېلز ایالت کې رایه اچونه د مازدیګر په ۶ بجو پای ته رسېدلې او تر هغې وروسته د رایو شمېرنه پیل شوې چې تر دې دمه لا پای ته نده رسېدلې.
سره لدې چې رای شمېرنه دوام لري او تر دې دمه له ۵۰ سلنه څخه زیاتې رایې شمېرل شوي، د ټاکنو شنونکي وايي چې لیبر (کارګر) ګوند ټاکنې ګټلې دي.
په همدې حال کې د لیبرال ګوند مشر، دومینیک پیروټېټ په ټاکنو کې خپله ماته منلې ده او اعلان یې کړی چې د لیبرال ګوند له ریاست څخه به لرې شي.
دومینیک پېروټېټ له تېرو ۱۸ میاشتو راهیسې د نیو ساوت وېلز ایالت مشر وه او تمه یې درلوده ترڅو ټاکنې وګټي.
د نن ورځې په ټاکنو کې لیبر ګوند له لیبرال څخه یو شمېر مهمې څوکۍ د سیډني په غرب کې ګټلي دي.
له ټاکنو وروسته د نیو ساوت وېلز ایالت د لیبر ګوند مشر، کریس منز خپلو پلویانو ته د خبرو پرمهال ویلي چې د دغه ایالت خلکو "نوي پیل" ته رایه ورکړې ده.
هغه وايي: "زه فکر کوم چې دا ټاکنیز کمپاین بې له شکه د درناوي او مدنيت نمونه وه."
"فکر کوم چې دا په دې هیواد کې د ډیموکراسۍ د سمې لارې لپاره یوه بیلګه کیدی شي."
د نیو ساوت وېلز ایالت پارلمان دوه جرګې لري چې د دغه ایالت د استازو او سنا (مشرانو) جرګو په نومونو یادېږي.
د نیو ساوت وېلز د استازو (ولسي جرګه) ۹۳ غړي لري.
په نیو ساوت وېلز ایالت کې د ټاکنو د کټلو لپاره لیبر ګوند ۴۷ څوکیو ته ضرورت لري. د د ای بي سي شبکې د وړاندوینې پر اساس لیبر به په ټاکنو کې ۵۰ څوکۍ ترلاسه کړي.
