د ملګرو ملتونو په یوه تازه رپوټ کې راغلي چې په ټوله نړۍ کې له هرو ۷۸ کسانو څخه یو کس په جبري توګه بې ځایه شوی دی.
د ملګرو ملتونو د کډوالو عالي کمیشنري وايي چې په روان کال کې د روسیې لخوا پر اوکراین حملې سره په نړۍ کې د تاوتریخوالی کچه دوه برابره زیاته شوې ده. دغه سازمان وايي چې هیوادونه باید د سولې د ودې لپاره په ګډه کار وکړي.
د ۲۰۲۱ کال په پای کې د جګړې، تاوتریخوالي، تعذیب او د بشري حقونو د سرغړونو له امله د بې ځایه شویو کسانو شمېر ۸۹ میلیونو کسانو ته رسېده. مګر د روان کال په پیل کې د روسیې لخوا په اوکراین برید دغه شمېرې له ۱۰۰ میلیونو څخه پورته کړي دي.
د آسټرالیا، نوي زیلنډ او ارام سمندر هېوادونو لپاره د ملګرو ملتونو د کډوالو عالي کمیشنرۍ (UNHCR) استازي، اډرین اډوارډز وايي چې تاوتریخوالی کم شوی نه دی.
له کومو هېوادونو څخه خلک بې ځایه شوي دي؟
د ملګرو ملتونو په رپوټ کې راغلي چې په ۲۰۲۱ کال کې ترټولو زیات خلک له سوریې، ونزوئلا، افغانستان، جنوبی سودان او برما څخه بې ځایه شوي وه.
د ملګرو ملتونو په رپوټ کې راغلي چې واک ته د طالبانو تر رسیدلو وروسته نږدې یو میلیون افغانان بې ځایه شوي دي.
تېر کال په ایتوپیا کې د جګړې له امله له دوو میلیونو څخه زیات خلک بې ځایه شوي. همدا راز برما کې له نظامی کودتا وروسته شاوخوا ۴۰۰ زره کسان تېښتې ته مجبوره شوي دي.
کومو هېوادونو ته زیات بې ځایه شوي خلک ورغلي دي؟
د ملګرو ملتونو په تازه رپوت کې راغلي چې ډیری بې ځایه شوي خلک ترکیې، کولمبیا، یوګاندا، پاکستان او جرمني ته ګډه شوي دي.
۳.۸ ملیونه ترکیې، ۱.۸ میلیونه کولمبیا، ۱.۵ میلیونه یوګاندا، ۱.۵ میلیونه پاکستان او ۱.۳ میلیونه بې ځایه شوي کسان جرمنی ته تللی دي.
ډیری بې ځایه شوي خلک، ګاونډیو هېوادونو ته تللي، په داسې حال کې چې د بې ځایه شویو خلکو ګاونډي هېوادونه په خپله ښه اقتصاد نلري.
راپور موندلې چې ډیری کډوال هیله لري ترڅو د ژوند لپاره مناسب ځای ولري او بیرته خپلو کورونو ته ستانه شي.
