د ویډیو سټریمینګ زموږ د سکرین ډیری برخه جوړوي، همداسې له کوره کار کول لا هم د اپلوډونو تر ټولو ستره برخه جوړوي، او اسټرالیا د براډبېنډ د سرعت له مخې په نړیوالو درجهبندیو کې ورو ورو پرمختګ کوي.
که څه هم ځینې ماشومان له ټولنیزو رسنیو لرې شوي، خو په استرالیا کې د براډبېنډ ډاونلوډونه مخ په زیاتېدو دي. په همدې حال کې، د کوینزلنډ اوسېدونکي لا هم تر بل هر ایالت او سیمې ډیره ډیټا کاروي.
د NBN Co له خوا د جمعې په ورځ خپاره شوي معلومات د اسټرالیا د خلکو د انلاین کارونې په اړه مالومات وړاندې کوی . په راپور کې ویل شوي، تمه ده د ۲۰۲۵ کال په پای کې ډاونلوډونه لږ راټیټ شي، خو بیا به د ۲۰۲۶ کال په جنورۍ کې بېرته لوړې کچې ته ورسېږي.
دا موندنې وروسته له هغې خپرېږي چې د هېواد د انټرنېټي اړیکو په برخه کې د بدلونونو یو کال تېر شو؛ په دې موده کې زرګونه کورنیو ته وړیا د سرعت لوړونې وړاندیزونه وشول، فایبر د پخوانۍ مسي (copper) ټکنالوژۍ د ځایناستې په توګه وغځول شو، او د سټارلنک (Starlink) په څېر د سپوږمکۍ انټرنېټ له عرضه کوونکو سره سیالي هم زیاته شوې ده.
د NBN Co د ټکنالوژۍ مشر ګای سکاټ (Guy Scott) وايي، همدا اصلاحات خلکو ته انګېزه ورکړې چې تفریحي محتوا لا ډېر خپره کړي؛ او اوس سټریمینګ د ملي براډبېنډ شبکې (NBN) له لارې د ډاونلوډ کېدونکو ټولو ډیټا ۴۸ سلنه جوړوي.
یاد شرکت اټکل کوي چې تر ۲۰۳۵ کال پورې به د ویډیو سټریمینګ د ملي براډبېنډ شبکې (NBN) د ټولو ډاونلوډونو ۵۹ سلنه برخه جوړه کړي.
د NBN Co د ټکنالوژۍ مشر ګای سکاټ (Guy Scott) وايي، ماشومان د سټریمینګ د غوښتنې یوه لویه سرچینه ده، ځکه تمه کېږي چې ډاونلوډونه به په ځانګړي ډول د ښوونځیو د رخصتیو پر مهال خپل اوج ته ورسېږي. که څه هم لویان په دوامداره ډول محتوا سټریم کوي.
هغه وویل: کله چې ماشومان له ښوونځي رخصت وي، شبکې عموماً لا ډېره بوختې شي، د اپرېل، جولای، سپتمبر او جنورۍ میاشتې زموږ لپاره ټولې د ډېرې بوختیا وختونه دي.
نوموړي زیاته کړه: هغه څه چې نه بدلېږي، د شبکې د ډېرې بوختیا ساعت دی، دا وخت تل تقریباً ثابت وي، او عموماً د شپې له ۹ څخه تر ۱۰ بجو پورې وي.
د Worldpanel ComTech د معلوماتو له مخې، په اسټرالیا کې له هر څلورو کورنیو څخه تر درې ډېرې، یعنې شاوخوا ۷۶ سلنه کورنۍ، د ویډیو سټریمینګ خدمتونه کاروي. راپور زیاتوي چې په ۲۰۲۵ کال کې Paramount+، Stan Sport او هغه ګډونونه چې د اعلانونو پر بنسټ دي (ad-supported subscriptions)، مخ په زیاتېدو وو.
د اړیکو پلاتفورمونه د اپلوډونو اصلي لامل
بلخوا د NBN Co په وینا، په ۲۰۲۵ کال کې د براډبېنډ اپلوډونه لا هم تر ډېره د اړیکو او غونډو پلاتفورمونو لکه Microsoft Teams او Zoom تر اغېز لاندې وو، او د شبکې د ټول ترافیک ۲۴ سلنه یې جوړوي.
NBN Co وايي، په ۲۰۲۵ کال کې د NBN له لارې اپلوډونه ۱۲ سلنه زیات شوي، او ډاونلوډونه ۱۰ سلنه لوړشویدي او د یوې میاشتې منځنۍ کچه یې ۵۰۸ ګیګابایټ ته رسېدلې ده. چې دا د ۲۰۱۹ کال د ډاونلوډونو نږدې دوه برابر ته رسېږي.
د کوینزلنډ اوسېدونکو په پرلهپسې دریم کال هم په منځنۍ کچه تر ټولو ډېره ډیټا ډاونلوډ کړې؛ ورپسې لوېدیځه استرالیا او ACT (د اسټرالیا پلازمېنې قلمرو) راځي، په داسې حال کې چې د تاسمانیا اوسېدونکو تر ټولو لږ ډیټا ډاونلوډ کړی دی.
په ۲۰۲۵ کال کې په ټوله اسټرالیا کې د ډاونلوډ سرعت هم لوړ شوی؛ چې مهم لامل یې د NBN له خوا د سپتمبر په میاشت کې د شاوخوا ۲.۷ میلیونه کاروونکو لپاره د سرعت د کچې وړیا لوړونې (free speed tier upgrades) او له جنورۍ راهیسې د شرایطو پوره کوونکو کورونو/ملکیتونو لپاره وړیا فایبر اپګرېډ (free fibre upgrades) بلل کېږي.
د NBN Co د ټکنالوژۍ مشر ګای سکاټ (Guy Scott) وايي، نږدې ۱۲ زره کورنۍ هره اوونۍ د لا چټکو او باوري فایبر اتصالونو ته لېږدېږي.
هغه وویل: موږ په بشپړ ډول تمه لرو چې د شبکې ترافیک به لا هم ډېره وده وکړي.
نوموړي زیاته کړه: موږ تر دې دمه د فایبر شبکه ۳.۵ میلیونه کورونو او نورو ملکیتونو (premises) ته غځولې، او د اوس نه تر ۲۰۳۰ کال پورې لا ۶۲۲ زره نور ملکیتونه هم لرو چې فایبر ورته جوړ کړو.
په همدې تړاو، اسټرالیا په دې وروستیو کې د Ookla Research د نړیوالو براډبېنډ د سرعت ازموینو په درجهبندۍ کې ۴۲م ځای خپل کړی چې په لومړي ځل یې بریتانیا (United Kingdom) شاته پرې ایښې او دا درجه یې دتېرې فبرورۍ د ۸۲م ځای په پرتله د پام وړ لوړه شوې ده.
شریکول
