د اسټراليا بهرنيو چارو وزيرې جوليا بيشوپ ويلي ول چې شمالي کوريا به د اسټراليا لا ډيرو بنديزو سره مخ شي او هم که چيرې د مزايلو نورې ازموينې وکړي نو اسټراليا به هم د امريکا په ملاتړ د شمالي کوريا ستونزې حل لپاره مداخله وکړي، ولې د يادو څرګندونو په غبر ګون کې شمالي کوريا سخت دريځ غوره کړ او جوليا بيشوپ خبرې يې مردارې او ناسمې وبللې او هم يې وويل چې اسټراليا د امريکا له خولې خبرې کوي.
شمالي کوريا د اسټراليا بهرنيو چارو وزيرې ته وويل چې خپلو خبرو کولو څخه مخکې دې دوه ځله سوچ وکړي او داسې بدو څرګندونو پايلې دې هم په پام کې ونيسي.
د اسټراليا بهرنيو چارو وزيرې يادو ګواښونو غبرګون کې وويل چې شمالي کوريا دې هغه پيسې چې په اټومي وسلو لګوي هغه دې خپلو بې وزلو وګړو باندې ولګوي ترڅو له بې وزلی خلاص شي.
د اسټراليا حکومت مخالف ګوند وايي چې د شمالي کوريا وروستۍ څرګندونې د انديښنې وړ دي.
د امريکا ولسمشر مرستيال مايک پينس دا مهال اسټراليا کې په درې ورځني سفر دي.
لومړي وزير مالکوم ټرنبل او مايک پينس په يو خبرې ناسته کې دواړو پر چين غږ وکړ چې پر شمالي کوريا فشار ډير کړي ترڅو شمالي کوريا په سيمه کې د نارامی خپرولو مخه ونيسي او هم د مزايلو ازموينه دې ودروي.
اسټراليا ته د امريکا پخوانی سفير وايي چې اسټراليا بايد د امريکا ترشا ودريږي او بل هيڅ لار نه لري.
شریکول
