د افغانستان د سولې لپاره د امریکا ځانګړي استازي زلمي خلیلزاد له افغانستان او پاکستان وروسته قطر ته سفر ترسره کړی.
نوموړي پر خپله ټویټر پانه لیکلي چې د پاکستان له لومړي وزیر عمران خان ، د بهرنیو چارو له وزیر محمود قریشي او یو شمېر نورو چارواکو سره یې د افغانستان د سولې په اړه خبرې ترسره کړي.
د طالبانو ویاند ذبیح الله مجاهد هم د سولې په تړاو په ټویټر کې لیکلي چې د سولې خبرې به نن د قطر په وخت په لسو بجو د امریکا او طالبانو ترمنځ پیل شي.
د امریکا او طالبانو سره د نن ورځې خبرې مهمې بلل کېږي او ګمان کېږي چې دا ځل به د طالبانو او امریکا ترمنځ خبرې پایله ولري.
پداسې حال کې چې تراوسه د امریکا او طالبانو ترمنځ کومه پریکړه نده شوې ، امریکايي چارواکو اعلان کړی چې د سولې له هوکړې سره به خپل ۶ زره سرتیري له افغانستان څخه وباسي او د امریکا د سرتیرو شمېر به ۸ زره کسانو ته را ښکته شي.
