اسراییلو د سه شنبې په ورځ په قطر کې د حماس پر لوړ پوړو مشرانو برید وکړ.
د اسراییلو حکومت د یوې اعلامیې په خپرولو سره تایید کړې چې دغه برید د اسراییلو لخوا یواځې ترسره شوی دی.
حماس تایید کړې چې د دغې وسلوالې ډلې پنځه غړي د اسرایيلو په برید کې وژل شوي دي. د حماس د سیاسي دفتر ویاند سهیل الهندي، الجزیرې ته ویلي چې د خلیل الحیه زوي هم په وژل شویو کې شامل دی.
په دغه برید کې د قطر د یو امنیتي سرتیري وژنه هم تایید شوې ده.
په همدې حال کې، قطر د اسرایيلو برید ته سخت غبرګون ښودلی دی. په ملګرو ملتونو کې د قطر سفیرې عالیه احمد سیف آل ثاني د امنیت شورا ته ویلي چې دغه برید یو «بزدلانه جنايي حمله» وه چې د سیمې امنیت ته یې زیان رسولی او د نړیوالو قوانینو ښکاره سرغړونه ده.
په قطر د اسراییلو بریدونو په نړیواله کچه سخت منفي غبرګونونه راوپارولي دي.
اروپايي ټولنې دغه بریدونه د نړیوال قانون او د قطر د ځمکنۍ بشپړتیا سرغړونه بللې ده.
اروپايي ټولنې د اسراییلو د برید د پایلو او په سیمه کې د تاوتریخوالي د زیاتېدو د ګواښ په اړه خبرداری ورکړی دی.
د اروپايي ټولنې د بهرنۍ پالیسۍ مشر کایا کلا ويلي له خپل "ستراتیژیک ملګري" سره بشپړ پیوستون څرګندوي او "په غزې کې د جګړې د هر دول زیاتوالي مخه باید ونیول شي".
د ملګرو ملتونو سرمنشي انتونیو ګوتریش دا برید وغانده او ویې ویل چې قطر په غزې کې د اوربند او د حماس له خوا د یرغمل شویو کسانو د خوشې کولو په برخه کې خورا مثبت رول لوبولی دی.
د ملګرو ملتونو د عمومي اسامبلۍ راتلونکې مشرې انالینا بیرباک هم د ۸۰مې غونډې په پرانیستونکې وینا کې دا برید وغانده او له ټولو خواوو یې وغوښتل چې تاوتریخوالی کم کړي.
هغې ویلي: "زه له ټولو خواوو څخه غوښتنه کوم چې اعظمي زغم وکاروي. لکه څنګه چې زموږ د ملګرو ملتونو منشور غوښتنه کوي، د ټولو غړو هیوادونو حاکمیت او ځمکنۍ بشپړتیا ته باید درناوی وشي او د هیڅ غړي هیواد لخوا سرغړونه ونشي."
