مهم خبرونه:
- د پاکستان يو لوړ پوړى پلاوى نن کابل ته ځي
- د روسيې له تور نوملړ څخه د طالبانو نوم ايستلو غبرګونونه راپارولي دي
- د افغانستان د کرېکټ له ١٩ کلونو کم عمره لوبډله سبا له نيپال سره لوبه لري.
د پاکستان يو لوړ پوړى پلاوى نن کابل ته ځي.
د پاکستان د بهرنيو چارو وزارت ويلي، چې ددغه پلاوي مشري د لومړي وزير مرستيال او د بهرنيو چارو وزارت وزير اسحاق ډار کوي٠
د پاکستان د بهرنيو چارو وزارت د يوې خبرپانې په خپرولو سره ويلي، چې دغه پلاوى به کابل کې د طالبانو له رييس الوزرا، اقتصادي مرستيال او د بهرنيو چارو له وزير سره لېده کاته ولري٠
د پاکستان د بهرنيو چارو وزارت ددغه سفر موخه دوه اړخيزو اړيکي، امنيت، سوداګري او سيمه ييز اتصال په ګوته کړى٠
د يادونې وړه ده، چې دغه پاکستاني پلاوى داسې مهال کابل ته راځي، چې همدا اوس د طالبانو د صنعت او سوداګرۍ وزارت د سرپرست وزير په مشرۍ يو پلاوى پاکستان کې ددغه هېواد له چارواکو سره په لېده کاته بوخت دى٠
د روسيې له تور نوملړ څخه د طالبانو نوم ايستلو غبرګونونه راپارولي دي.
د ملګرو ملتونو سازمان د سرمنشي وياند ستيفن دوجاريک د روسيې دا پرېکړه يوه خپلواکه کورنۍ پرېکړه بللې او ويلي يې دي، چې دا بدلونه به د طالبانو په اړه ددغه سازمان دريځ کې تغير را نه ولي٠
هغه ويلي، چې د ملګرو ملتونو د غړو هېوادونو لخوا پر طالبانو لګول شوي بنديزونه په خپل ځاى دي٠
له دې سره هم مهاله د روسيې د بهرنيو چارو وزارت هم ويلي، که څه هم طالبان يې د ترهګرو ډلو له نوملړه لرې کړي، خو لاهم د ملګرو ملتونو د امنيت شورا له لوري پر دغې ډلې لګيدلو بنديزونو ته ژمن دي٠
بل لورته طالبانو د روسيې له لوري د ترهګرو له نوملړه ددې ډلې د نوم د لرې کېدو له پريکړې هر کلى کړى٠
د طالبانو وياند ذبيح الله مجاهد ويلي، چې د روسيې ولسمشر ولاديمير پوتين له طالبانو سره سم سياست غوره کړى٠
د پادونې وړه چې د روسيې سترې محکمې د اپريل په 17 مه ددغه هېواد د لويې څارنوالۍ د غوښتنې پر بنسټ طالبان د ترهګرو ډلو له نوملړ څخه وايستل٠
د افغانستان د کرېکټ له ١٩ کلونو کم عمره لوبډله سبا له نيپال سره لوبه لري.
دواړه لوبډلې دغه سيالۍ د ٢٠٢٦ کال نړيوال جام ته د لارې موندنې په موخه ترسره کوي٠
د افغانستان کرېکټ بورډ د يوې خبرپاڼې په خپرولو سره ويلي، چې دغه لوبه سبا د کابل پر وخت ٨:١٥ دقيقې د نيپال په کوربتوب ترسره کيږي چې ګټونکي لوبډله به يې د کرېکټ نړيوالې شورا له ١٩ کلونو کم عمره لوبغاړو نړيوال جام ته لاره ومومي٠
افغان لوبډلې دغه جام ته د لارې موندنې په موخه تر دې وړاندې، عمان، هانګ کانګ او متحده عربي اماراتو ته ماتې ورکړې٠
ټاکل شوې، د کرېکټ نړيوالې شورا له ١٩ کلونو کم عمره لوبغاړو پنځوس اوريز نړيوال جام سيالۍ د راتلونکې ٢٠٢٦ کال په لومړيو مياشتو کې په نميبيا، او زمبابوي هېوادونو کې ترسره شي٠
