د زیمبابوې د پارکونو ویاند ویلي چې د دغه هېواد د ویکتوریا فالس په ملي پارک کې یو آسټرالیایی سیلانی ورک شوی دی.
د زیمبابوې د ملي پارکونو او ځنګلي ژوند د ادارې ویاند تیناشې فاراو اسوشیټیډ پریس خبري اژانس ته ویلي چې دغه سیلانی د جمعې په ورځ په پراخ باراني ځنګل کې ورک شوی دی.
فاراو ویلي:"موږ یو بشپړ ټیم لرو چې پولیس پکې د سیلانیانو په لټه کې دي. موږ په ځمکه کې سپي، ډرون او تعقیبونکي (ټرکرونه) ځای پرځای کړي دي."
هغه ویلي چې ورک شوی سیلاني ۶۷ کاله عمر لري، مګر د هغه په اړه یې نور معلومات ندي شریک کړي.
دا ډول پیښې په ویکټوریا فالس کې نادرې دي، هغه ځای چې د نړۍ له ګوټ ګوټ څخه په زرګونو سیلانیان د دې ملي پارک لیدلو ته را جلبوي.
دې ته ورته ځینې قضیې د زیمبابوې په نورو پارکونو کې ثبت شوي. یو آلمانی سیاح چې تېر کال په شمالي زمبابوې کې د متوسډونا په ملي پارک کې ورک شوی و، له راپور درې ورځې وروسته ژوندی او په ښې روغتیا کې وموندل شو.
