د افغانستان او پاکستان د کرېکټ د ملي لوبډلو ترمنځ درې یو ورځنۍ لوبې په سریلانکا کې ترسره شوې او پاکستان درې واړه لوبې وګټلې.
لومړۍ یو ورځنۍ لوبه د آګسټ پر ۲۲مه نېټه د سریلانکا په همبنټوټا ښار کې ترسره شوه او پاکستان، افغانستان ته په ۱۴۲ منډو ماته ورکړه.
دویم لوبه هم د آګسټ پر ۲۴ نېټه په همبنټوټا ښار کې ترسره شوه او پاکستان په یوې وېکټې لوبه وګټله.
د پاکستان او افغانستان ترمنځ د یو ورځنیو لوبو د سریز وروستۍ لوبه تېر ماښام په کولمبو ښار کې ترسره شوه او پاکستان د ۵۹ منډو په توپیر سره بریا په خپل نوم ثبت کړه.
له افغانستان څخه د وروستیو دریو لوبو له ګټلو وروسته، پاکستان د کرېکټ نړیوالې شورا د یو ورځنیو لوبو په درجه بندۍ کې لومړی ځای خپل کړ او د آسټرالیا له لوبډلې مخکې شو.
د کرېکټ نړیوالې شورا د یو ورځنیو لوبو په درجه بندۍ کې آسټرالیا دویم، هند دریم، نوی زیلنډ څلورم او افغانستان نهم ځای لري.
