په افغانستان کې د جمهوریت له سقوط وروسته د آسټرالیا حکومت د افغانستان اوسېدونکو لپاره ۳۱ زره او ۵۰۰ ویزې اعلان کړې، ترڅو په راتلونکو څلورو کلونو کې په شرایطو برابرو افغانانو ته ورکړل شي.
د آسټرالیا د کورنیو چارو وزارت لخوا خپاره شوي آمار ښيي چې د جمهوریت له سقوط وروسته، له ۲۰۰ زرو څخه زیاتو افغانانو د دغو ویزو لپاره خپل غوښتنلیکونه سپارلي، مګر تر دې دمه یواځې ۶۴۰۰ کسانو ته ویزې ورکړل شوي دي.
د آسټرالیا د کډوالو چارو وزیر، انډریو جایلز له اس بي اس شبکې سره په یوې ځانګړې مرکې کې ویلي چې د ویزو لپاره د افغانانو لخوا تقاضا "په بشپړه توګه بې سارې" ده.
"د پناه غوښتنې لپاره تقاضا خورا لوړه ده."
"هغه کسان چې د ۲۰ کلونو په اوږدو کې یې د آسټرالیایانو مرسته کړې، تر ټولو زیات لومړیتوب لري."
تېره میاشت د آسټرالیا د کورنیو چارو وزارت یوه ویاند، د اس بي اس پښتو راډیو د پوښتنو په ځواب کې ویلي وه چې د ۲۰۱۳ کال له جولای میاشتې راهیسې، له ۱۶ زره او ۵۰۰ څخه زیات افغانان د بشردوستانه ویزو پروګرام له لارې آسټرالیا ته راغلي دي.
"د ۲۰۱۳ کال د جولای له لومړۍ نیټې راهیسې، د بشردوستانه پروګرام له لارې له ۱۶۵۰۰ څخه زیاتو افغانانو ته ویزې ورکړل شوې دي."
"هغه کسان چې په خطر کې دي او د ویزو شرایط پوره کوي، ژر تر ژره به په آسټرالیا کې استوګن شي."
د آسټرالیا د کډوالو چارو له وزیر انډریو جایلز سره ترسره شوې انګلیسي مرکه دلته اوریدلی شئ.
