په داسې حال کې چې د ژوند لګښت په آسټرالیا کې زیات شوی، د دغه هېواد په ډېریو برخو کې د کرایې زیاتوالی په کورنیو مالي فشار نور هم زیاتوي.
د ډومېن (Domain) شرکت لخوا په یوه خپاره شوي راپور کې راغلي چې په تېر یوه کال کې د آسټرالیا په ۶ ایالتونو او دوو سیمو کې د کورونو کرایې لوړې تللي دي.
په اوسط ډول سره د آسټرالیا په مرکزي ښارونو کې تر سپتمبر میاشتې پورې، په یوه کال کې د کورونو کرایې ۱۲.۸ سلنه او د اپارتمانونه کرایې ۱۶.۷ سلنه پورته تللې دي.
د نیو ساوت وېلز ایالت د کرایه ورکوونکو اتحادیې اجراییوي مشر، لیو پیټرسن اس بي اس نیوز سره په خبرو کې ویلي چې "موږ دا مهال په داسې مارکېټ کې یو چې په غیر معمولي ډول سره کرایه په ګړندۍ ډول لوړېږي."
د آسټرالیا د احصایې ادارې آمار ښيي، په ۲۰۲۱ کال کې شاوخوا ۹.۸ میلیونه کورونه په آسټرالیا کې ثبت شوي وه چې ۳۱ سلنه یې کرایي کورونه وه.
په داسې حال کې چې د کرونا د وبا پرمهال په آسټرالیا کې د کورونو کرایې راټیټې شوې، مګر له کرونا وروسته د کورونو لپاره د تقاضا زیوالی او په مارکېټ کې د کورونو د عرضې کموالی، د دې لامل ګرځېدلي ترڅو د کورونو کرایې لوړې شي.
د پروپټرېک ادارې اقتصاد پوه، انګس مور وايي، د کرایي کورونو او انتخاب کمووالی د دي لامل ګرځېدلي ترڅو کرایه پورته ولاړه شي.
هغه وايي: "د خالي ځایونو شمېر خورا ټیټ دی، په realestate.com.au کې د کرایې کورونو شمیر د کرونا له وبا مخکې حالت څخه کم دی."
Source: SBS
د نیو ساوت وېلز ایالت د کرایه ورکوونکو اتحادیې اجراییوي مشر، لیو پیټرسن راس وایي دا څرګنده نده چې تر کومه وخته به د کورونو کرایې لوړېږي، مګر کورنۍ لا دمخه د فشار احساس کوي.
"داپه رښتیا ډېر د اندېښنې وخت ده. یو زیات شمېر خلک موږ ته زنګ وهي چې د کورونو پیدا کولو، لوړې کرایې او د خپل کور د بودیجې په اړه اندېښنه لري."
کرایه ورکوونکي څرنګه کولای شي، دې حالت سره مبارزه وکړي؟
په داسې حالت کې چې د کورونو کرایې د لوړېدو په حال کې دي. کرایه ورکوونکي ډېر څه نشي کولای، مګر کولای شي پداسې ځای کې کور پیدا کړي چېرته چې په مارکېټ کې کرایي کورونه زیات وي.
د کینسټار له ادارې څخه سټیو میکن بیکر وايي: " تاسو کولی شئ، د یوې داسې ساحې په لټه کې شئ چې د خالي کورونو شمېر په کې زیات وي، ترڅو تاسو فشار لاندې ونه اوسئ"
ښاغلی پیټرسن راس وایي، د ډېرېدونکې کرایې له اغیزې سره د مبارزې لپاره "خلک ډېره څه نشي کولای."
What you need to know about the mandatory safety check for rental homes in Victoria from March 29 Source: Getty / Getty Images
ښاغلی پیټرسن راس وايي که چېرې ستاسو د کور مالک، ستاسو کرایه زیاته کړي نو تاسو کولای شئ د کرایه ورکوونکو له اتحادیې او یا هم د خپلې ټولنې له حقوقي مرکز سره اړیکه ونیسئ او له خپلو شرایطو سره مناسبه مشوره ترلاسه کړئ.
هغه وايي، د کرایي کورونو لپاره د تقاضا له لوړوالي سره، مارکېټ او حقوقي ادارو د کورونو مالکینو او د ملکیت مدیرانو ته د خبرو اترو او معاملې لپاره زمینه برابره کړې ده.
د کور مالک او کرایه ورکوونکي ترمنځ خبرې اترې د لومړي ګام په توګه وړاندیز کیږي ځکه چې د کور مالک اختیار لري ترڅو د کرایې د زیاتوالي مقدار بیرته واخلي یا کم کړي.
ښاغلی پیټرسن وايي، که چېرې یو کرایه ورکوونکې د کرایې د لوړوالي په اړه خوښ نه وي، نو کولای شي په محلي محکمې، کمیشنرۍ یا ټرایبیونل کې خپله دوسیه ثبت کړي.
په محکې کې پرېکړه د قاضي لخوا نیول کېږي، د دې خبرې ضمانت نشته چې محکمې ته له تګ سره به د کرایې لوړوالي پرېکړه لغوه شي.
زمونږ خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
