د وېکټوریا ایالت پولیس تېره ورځ په پورپونکا (Porepunkah) کې یوه ملکیت ته ورغلي و ترڅو د تورن شخص د نیولو حکم عملي کړي چې برید پرې وشو.
پورپونکا د ملبورن شمال ختیځ ته شاوخوا ۳۰۰ کیلومتره لرې پروت دی.
د وېکټوریا ایالت د پولیسو په اعلامیې کې راغلي چې د پولیسو ۱۰ افسران تېره ورځ سهار د حکم د عملي کولو لپاره یاد ملکیت ته ورغلي و.
په اعلامیې کې راغلي: "دوه افسران په ډزو ووژل شول او دریم یې د بدن په ښکته برخه کې د ډزو له امله سخت ټپي شو."
"داسې انګیرل کیږي چې مجرم له هغه وروسته ملکیت پریښی او دا مهال د هغه ځای نامعلوم دی."
د وېکټوریا پولیسو ۵۶ کلن ډیزي فریمن د پولیسو په وژنې تورن کړی.
د ویکټوریا د پولیسو کمشنر مایک بوش ویلي، د پورپونکا شکمن وسله وال ډیزي فریمن لا هم نه دی نیول شوی او 'درنې وسلې لري'.
هغه وايي:"محتاط اوسئ. ځانونه خوندي وساتئ. مهرباني وکړئ که اړتیا نه لرئ بهر مه ځئ. موږ به د دې درنو وسلو لرونکي کس د موندلو لپاره هرڅه وکړو."
"مګر که تاسو داسې څه وګورئ چې ستاسو شک راپاروي، او تاسو فکر کوئ چې موږ باید پوه شو،
مهرباني وکړئ 000 ته زنګ ووهئ او سمدلاسه موږ ته ووایاست،"
د اس بي اس پښتو خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
