شاوخوا دوه میاشتې وروسته یو ځل بیا په وېکټوریا ایالت کې د کرونا وېروس ۳ نوې پېښې ثبت شوي. د وېکټوریا ایالت د روغتیا ادارې مسئولین وايي چې نوې پېښې د ملبورن ښار په میچم (Micham)، هېلم (Halam) او مینتون سیمو کې ثبت شوي.
ګمان کېږي چې په ملبورن ښار کې نوې ثبت شوې پېښې به د سیډني ښار د کرونا وېروس له پېښو سره تړاو ولري.
د ترسره شویو څېړنو لومړنۍ پایلې ښيي چې اخته کسانو په وروستیو کې د نیو ساوت ویلز ایالت ته سفر ندی ترسره کړی. مګر د پېښو د منبع معلومولو لپاره څېړنې روانې دي.
د ویکټوریا ایالت ترڅنګ نن په نیو ساوت ویلز ایالت کې هم د کرونا وېروس ۱۸ نوې پېښې ثبت شوي چې ۹ نوې ثبت شوې پېښې د سیډني ښار له شمالي ساحلي سیمو سره تړاو لري.
په تېرو ۲۴ ساعتونو کې په آسټرالیا کې د کرونا وېروس ۳۱ نوې پېښې ثبت شوي. د نویو پېښو له ثبت سره په دغه هېواد کې د ټولو پېښو شمېر ۲۸۳۸۱ ته رسیدلی دی.
د آسټرالیا اوسېدونکي باید له یو بل سره ۱.۵ فاصله و ساتي.
د کرونا وېروس آزموینه اوسمهال د اسټرالیا په بېلابېلو سیمو کې ترسره کېږي. که چېرې تاسو باور لرئ چې تاسو هم ممکن په کرونا وېروس اخته شوي یاست، نو خپل ډاکټر ته زنګ ووهئ (لیدنه ونکړئ) یا د کرونا وېروس د معلوماتو له ملي مرکز سره په ۰۸۰ ۰۲۰ ۱۸۰۰ شمېره اړیکه ونیسئ. که تاسو په ساه اخیستلو کې ستونزه لرئ نو له 000 شمېرې سره اړیکه ونیسئ.
تاسو کولای شئ، د خپل موبایل له اپ سټور څخه د کوېډ سېف (COVIDSafe) اپلېکېشن ډاونلوډ کړئ.
د اس بي اس شبکه ژمنه ده ترڅو تاسو ته د کرونا وېروس په اړه ستاسو په ژبه باوري راپورونه چمتو کړي. دلته تاسو کولای شئ په ۶۳ ژبو خبرونه او معلومات پیدا کړئ: https://www.sbs.com.au/language/coronavirus
