ويکتوريا ايالت کې تر پرون شپې ۸ بجو پورې ۳۷۲ نوې پيښې ثبت کړې او ۱۴ کسانو بيا خپل ژوند له لاسه ورکړ.
ياد ايالت کې تر اوسه ۲۸۹ کسانو خپل ژوند له لاسه ورکړی او هم پرون د کرونا ويروس له امله د يو کس مړينه چې عمر يې ۲۰ کلونو شاوخوا وه اسټراليا کې تر ټولو کم عمره مړينه ثبت شوه.
نور مړه شوي کسان د ۸۰ او ۹۰ کلونو عمر لرونکي زاړه کسان ول.
ويکټوريا ايالت کې له ۱۴ مړو کسانو څخه ۱۲ يې د زړو کسانو ساتنې مرکزونو کې پر کرونا ويروس اخته شوي ول.
د ويکټوريا ايالت صدراعظم (پريمير) ډينيل انډريوس نن خبريالانو ته وويل، "ياد ايالت کې دا مهال د کرونا ويروس ۳۱۱۹ پيښې داسې دي کوم چې د اخته کيدو ښکاره وجه يې نده معلومه او د روغتيا چارواکو لپاره نا معلومې پيښې دي."
"مونږ دا ويلي چې داسې حالت مونږ ډير انديښمن کړي يو، ځکه مونږ پر داسې نامعلومو پيښو کار نشو کولی د کومو چې منبع د ويروس اخيستلو معلومې نه وي. دا مونږ لپاره تر ټولو ستره ننګونه ده او هم زمونږ ډير وخت پر همداسې پيښو لګول کيږي."
د ويکټوريا ايالت روغتيا برخې مشر بريت ساتون بيا وايي، ډير له نوو نا معلومو پيښو څخه په هغو ځوانانو کې ليدل کيږي د کومو عمرونه چې د ۲۰-۲۹ ترمينځ دي.
ښاغلی انډريوس وايي، همدا ځوانانو چې ډيره کې پر کرونا ويروس اخته کيږي، دوی کارونه ته ځي، بازارونو کې توکي پيري او ځينو برخو کې له شته قوانينو سر غړونې هم کوي.
ويکټوريا ايالت کې دا مهال ۱۱۸۸ روغتيا کار کوونکي پر کرونا ويروس اخته شوي.
د اسټراليا The Age ورځپاڼې رپوټ له مخه د ملبورن ښار د يو هوټل منيجر له يو بهرني مسافر څخه قرنطين وخت کې ويروس اخيستی او بيا نورو کار کوونکو او امنيتي ګارډانو ته ليږدولی.
د اسټراليا لومړي وزير سکاټ موريسن نن د جمعې په ورځ خبريالانو ته وويل، اسټراليا له ډيرو پيچلو مسايلو سره لاس او ګريوان دی.
"خواشينونکی حقيقت دا دی چې مونږ په ځينو ورځو کې شاته پاتې يو، يعنې ځينو ورځو کې د کرونا ويروس کابو کوو او ځينو ورځو کې بيا مونږ له ستونزو سره مخوي."
ښاغلی لومړی وزير وايي، د کرونا ويروس نړيواله وبا د اسټراليا په ګډون نور ډير هيوادونو يې له ستونزو سره مخ دي.
