د ټویټر شبکې نوي مشر، ایلان ماسک پر خپله ټویټر پاڼه لیکلي چې د دغې شبکې د تایید شویو یا آبي ټیک مارک لرونکو حسابونو درلودونکي باید په میاشت کې ۸ امریکایي (۱۲.۵ اسټرالیايي) ډالره فیس ورکړي.
هغه استدلال کوي چې له دې بدلون سره به د دغې شبکې د "اوسني مالکانو او بزګرانو سیسټم" بدلون پیدا کړي او د شرکت لپاره به د عاید نوی جریان رامینځته شي.
نوموړي د ټویټر شبکې له کنټرول اخیستلو ۵ ورځې وروسته پر خپله ټویټر پاڼه لیکلي چې د آبي ټیک مارک لپاره له کاروونکو ۸ امریکايي ډالره اخیستل کېږي.
د دې ترڅنګ د واشنګټن پوسټ په یوه رپوټ کې راغلي چې ایلان ماسک په پام کې لري ترڅو د ټویټر شبکې په ادارې کې هم ځینې بدلونونه راولي او ۷۵ سلنه پخواني کارکوونکي له دندو لرې کړي.
تېره اوونۍ ایلان ماسک د ټوېټر شبکې د کنټرول له ترلاسه کولو وروسته په سملاسي توګه د دې کمپنۍ اجرایوي مشر پاراګ اګروال، د مالي برخې مشر نیډ سیګال او د کمپنۍ حقوقي مشر ویجې ګډ له دندو لرې کړل.
ایلان ماسک اوسمهال د نړۍ تر ټولو شتمن کس دی، نوموړي تېره اوونۍ د ټویټر شبکه په ۴۴ میلیارډه امریکایي (۶۸ میلیارده آسټرالیا) ډالره واخیسته.
