د تېرې شنبې په ورځ د سعودي عربستان په بقیق ښار کې د ارامکو شرکت د تېلو پاکولو په یوه لوی مرکز برید ترسره شو او تر هغې وروسته نړیوالو بازارونو ته د تېلو تولید شاوخوا ۵ سلنه کم شو چې له دغه کار سره د تېلو بیې په نړیوالو بازارونو کې لوړې شوې.
د اقتصادي چارو شنونکو، د استرالیا اوسیدونکو ته هم خبردارۍ ورکړی چې سعودي عربستان کې د تیلو پر مرکز برید به په استرالیا کې هم د تېلو په بیو اغېز ولري.
د فیول ټرک اداره، د اسټرالیا او نوي زیلڼد اوسیدونکو ته د تېلو دمارکېټ په اړه معلومات وړاندې کوي. د دغې ادارې عمومي مدیر، جیف ټروټر وايي، په نړیوالو بازارونو کې د تېلو په تولید کې کموالی کیدای شي د استرالیا په مارکېټونو کې د هر لیتر تېلو بیه له ۱۰ تر ۱۲ سنټو پورې لوړه کړي.
په سعودي عربستان کې د ارامکو شرکت د تېلو په چاڼځیو له برید وروسته یو شمېر امریکايي چارواکو اعلان وکړ چې د دغه برید ترشا ایران لاس لري خو ایران دغه تورونه رد کړه او په یمن کې ایران پلوه هوثي ډلې د برید مسولیت په غاړه واخیست.
وروستي راپورونه ښيي چې امریکا ته هغه ځای معلوم شوی، له کوم ځای څخه چې د سعودي عربستان د تېلو د پاکولو مرکز په نښه کړی دی. د بي بي سي شبکې د رپوټ پر اساس یوه لوړ پوړي امریکايي چارواکي ویلي، له کوم ځای څخه چې برید شوی هغه د ایران په سویل کې موقعیت لري.
شریکول
