د وېکټوریا ایالت پولیسو تایید کړې چې ۳۱ کلنه ښځه یې د ملبورن ښار له پاسکو ویل سیمې څخه نیولی ده.
د پولیسو په اعلامیې کې راغلي چې نیول شوې ښځه په قصدي او بې پروایۍ سره ټپي کولو، غیر قانوني او شدید برید تورنه شوې ده.
د ویکټوریا پولیس ادعا کوي چې تېره اوونۍ دوه ښځې له دې امله په نښه شوي چې سرونه یې پټ و.
له دې وړاندې یوې ښځې چې برید پرې شوی، اس بي اس نیوز ته ویلي و چې هغه باور لري دغه بریدونه د اسلاموفوبیا له امله شوي ځکه چې دواړو ښځو حجابونه اغوستي و.
د وېکټوریا د پولیسو یوه ویاند ویلي چې "پلټونکي د یوې قرباني ښځې په وړاندې د آنلاین ګواښونو د راپور په اړه هم څیړنو ته دوام ورکوي."
"زموږ په ټولنه کې د تبعیض، نژاد پرستۍ، یا کرکې پر بنسټ چلند لپاره هیڅ ځای نشته او دا ډول فعالیت به ونه زغمل شي."
یوې ښځې د نیول کېدو د خبر له ترلاسه کولو وروسته اس بي اس نیوز ته ویلي چې هغه "عدالت" غواړي او له ادعا شوي برید وروسته لا هم له کور وتلو څخه ویره لري.
په همدې حال کې له چارواکو څخه غوښتل شوي چې د اسلاموفوبیا پیښو مخنیوي او ځواب ویلو لپاره ډیر څه وکړي.
په آسټرالیا کې له اسلاموفوبیا سره د مبارزې لپاره ځانګړی استازی، آفتاب ملک وايي چې د مسلمانانو د خوندیتوب ډاډ ترلاسه کولو لپاره باید لا ډېر امکانات برابر شي.
د آسترالیا لومړي وزیر، انتوني البنیزي دا بریدونه غندلي او ویلي یې دي چې هیڅوک باید د خپل هویت له امله د ناامنۍ احساس ونه کړي.
د اس بي اس پښتو خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
شریکول
