د افغانستان بانک د شنبې ورځ د اکتوبر ۲۲ مه د یوې اعلامیې له لارې وویل چې د افغانیو د نوو بانک نوټونو د چاپ په برخه کې د پام وړ پرمختګ ته نږدې شوي او په خبره يې په نږدې وختونو کې به د افغانیو نوي چاپ شوي بانک نوټونه هېواد ته را ورسیږي.
دا پر افغانستان د طالبانو تر حاکمیت وروسته لومړی ځل دی چې د افغانیو نوي بانک نوټونه چاپیږي.
بلخوا د افغانستان لپاره د امریکا ځانګړي استازي ټام ویسټ د شنبې په ورځ د امریکا مېشتو افغانانو یوې غونډې کې وویل چې ډېر ژر به نوي چاپ شوي افغاني بانک نوټونه افغانستان ته ولېږدول شي.
هغه په دې اړه جزیات ورنکړل چې نوي چاپ شوې پیسې به په دقیق ډول څه وخت بازار ته وړاندې شي، خو زیاته يې کړه له دې کار څخه ملاتړ کوي.
هڅه مو وکړه چې ددغه بانک نوټونو د شمېر په اړه او دغه راز چې کله به افغانستان ته راوړل کیږي د طالبانو تر کنټرول لاندې د افغانستان بانک چارواکو نظر له ځانه سره ولرو خو د دې بانک ویاند زمونږ پوښتنې ځواب نه کړې.
خو د اقتصادي چارو یو شمېر شنونکي بیا په دې باور دي چې، نوي چاپ شوې افغانۍ به د راکړې ورکړې پر مهال هېوادوالو ته اسانتیاوې برابرې کړي.
دوی اس بي اس راډیو سره په خبرو کې وویل، چې د نویو افغاني بانک نوټونو د چاپ اجازه د افغانستان د اقتصاد لپاره په اوسنیو شرایطو کې مهمه مسله ده ځکه د طالبانو له راتګ وروسته په بازارونو کې د زړو پیسو حجم زیات شوي وه چې له امله سوداګر، صرافان او خلک له ګڼو ستونزو سره مخ ول.
پدې اړه له کابل څخه رحيم الدين اورياخيل رپوټ لري چې سپيکت تڼۍ کليکاږلو سره يې اوريدلی شئ.
