د افغانستان د کرېکټ غوره لیګ (APL) شل اوریزې سیالۍ، چې لومړی پړاو یې اووه کاله وړاندې ترسره شوی و، ټاکل شوې ده چې دویم پړاو یې د ۲۰۲۶ زېږدیز کال په وروستۍ ربع کې ترسره شي.
د افغانستان د کرېکټ بورډ د معلوماتو له مخې، یاد لیګ به په متحده عربي اماراتو کې ترسره شي او پنځه لوبډلې به پکې ګډون ولري.
همدارنګه ویل شوي، چې د لوبغاړو د ډرافټ یا د لوبډلو د جوړښت مراسم به د لیګ له پیل وړاندې ترسره شي.
د افغانستان کرېکټ بورډ چارواکو ویلي، د دې لیګ د ترسره کېدو وخت ځکه د ۲۰۲۶ کال ورستیوو میاشتو ته وځنډول شو، چې د ملي لوبډلې لوبغاړي به د ۲۰۲۶ کال په لومړیو میاشتو کې په بېلابېلو نړیوالو سیالیو او لوبلړیو کې بوخت وي.
د افغانستان کرېکټ بورډ د افغانستان د غوره لیګ سیالیو بیا پیل یو مهم پرمختګ بولي.
د بورډ په وینا، د دې ډول سوداګریزو لیګونو ترسره کول د هر هېواد د کرېکټ د پرمختګ لپاره مهم ارزښت لري.
د کرېکټ بورډ ویاند، سید نسیم سادات، اس بي اس پښتو ته ویلي، د افغانستان لپاره د دې لیګ بیا پیل یو ستر ګام دی، ځکه چې له تېرو څو کلونو راهیسې پرې کار روان و.
مهرباني وکړئ لا ډېر معلومات په رپوټ کې واورئ.
د اس بي اس پښتو خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
