خو دا ورځ په افغانستان کې داسې مهال را رسیږي، چې لاهم میلیونونه نجونې په دغه هېواد کې له خپل بنسټیز حق، یعنې زده کړو بې برخې دي.
یو شمېر افغان نجونې وايي، د زده کړو نړیواله ورځ د دوی لپاره هېڅ معنا نه لري، ځکه په اوسنیو شرایطو کې ښوونځیو او نه هم پوهنتونونو ته د تګ اجازه لري..
اورځلا، چې یوه افغان زده کوونکې ده او له زده کړو محرومه شوې، اس بي اس پښتو ته وویل، دا ورځ ورته دیر بد احساس ورکوي.
د هغې په وینا، په داسې حال کې چې د نړۍ په نورو هېوادونو کې د زده کړو نړیواله ورځ لمانځل کیږي، افغان نجونې په خپلو کورونو کې ناستې دي او خپل راتلونکی تیاره ویني.
هغې زیاته کړه چې د زده کړو بندیز د هغې پر ژوند او راتلونکو هېلو ناوړه اغېز کړی او د زرګونو افغان نجونو ارمانونه يې له جدي ګواښ سره مخ کړي دي.
نوموړي وايي، له زده کړو محرومیت نه یوازې تعلیمي، بلکې ژورې روحي ستونزې هم رامنځته کړي دي او ډېری نجونې د ناامیدۍ احساس کوي.
هڅه مو وکړه چې د افغان نجونو ددغو اندېښنو او غوښتنو په اړه د طالب چارواکو نظر هم له ځانه سره ولرو خو له هڅو سره سره بریالي نشوو.
خو تر دې وړاندې بیا دې ډلې ویلي چې د نجونو د زده کړو مسله موقتي ده او د زده کړو د مناسب چاپېرال په رامنځته کولو او د افغانستان د اسلامي او دودیز قوانینو سره سم به بیا پرانیستل شي.
د یادونې وړ ده چې د ملګرو ملتونو عمومي اسامبلۍ د ۲۰۱۸ کال د ډسمبر په میاشت کې د جنورۍ ۲۴مه د زده کړو د نړیوالې ورځې په نوم ونوموله، چې موخه يې د نړیوالې سولې د ټینګښت او تلپاتې پراختیا په برخه ې د زده کړو پر بنسټیز رول ټینګار دی.
مهرباني وکړئ لا ډېر معلومات په رپوټ کې واورئ.
د اس بي اس پښتو خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
