اسټراليا کې لومړي ځل لپاره د باچاخان لارښود او عمل تر سيوري لاندې د عوامي نيشنل پارټي څانګه پرانيستل شوه.
د پښتنو تر ټولو تاريخي سياسي ګوند چې لا اوس هم په پاکستان کې پراخ فعاليت لري او د ياد هيواد ترڅنګ په ۱۳ نورو هيوادونو کې څانګې لري چې له هغې لارې بهر هيوادونو کې پښتنو ته خدمت ترڅنګ پښتانه سره نښلوي.
اسټراليا کې د عوامي نيشنل پارټي رسمي غونډه د يکشنبې په ورځ د نومبر مياشت پر ۱۴ نيټه سيدني ښار کې جوړه شوه چې پکې ګڼو پښتنو ګډون کړی وه.
اسټراليا کې د ياد ګوند مشري کامله مياخيل کوي.
اغلې له اس بي اس پښتو سره مرکې دوران کې وويل، له ۵ مياشتو ناستو او مشورو او هم د عوامي نيشنل پارټی مرکزي دفتر څخه تر اجازې اخيستلو وروسته يې اسټراليا کې د ياد ګوند څانګه پرانيستله.
اغلې وايي، عوامي نيشنل پارټي يوازي سياسي موخې نه لري بلکې د ياد ګوند غونډو او فعاليتونو له لارې پښتنو ته تاريخ، کلتور، ژبه او هوسا ژوند لارې ښودل کيږي.
د اغلې مياخيل په وينا، اسټراليا کې پښتانه د ياد ګوند چتر لاندې راټوليدلی شي او نه يوازې اسټراليا کې ميشتو پښتنو لپاره ډير ګټور پروګرامونه جوړوي بلکې د اسټراليا او له اسټراليا څخه بهر پښتنو يوځای کولو کې به هم ياد ګوند رغنده رول ولوبوي.
اس بي اس پښتو خپرونې سره په اسټراليا کې د عوامي نيشنل پارټي مشرې کامله مياخيل بشپړه مرکه واورئ.
