پدې ملي سيالي کې د اسټراليا د بيلابيلو ژبو ويونکي ګډون کوي او خپل ژبې سره مينه له اس بي اس شبکې سره د www.sbs.com.au/nlc19 ويبپاڼې له لارې ښايي.
دا سيالي داسې مهال پر مخ اچول کيږي چې د اسټراليا بيلابيلو لويو ښارونو کې زرګونه پښتانه ميشت دې ولې د ګوتو په شمير کورنۍ خپل ماشومان د پښتو ژبې او کلتور زده کړې لپاره يې شته ښوونځيو ته ليږي.
د مورنۍ ژبې او کلتور ساتلو لپاره د اسټراليا په ګډون د نړۍ يو شمير حکومتونه له ټولنو سره ځانګړې مرستې کوي ترڅو دوی خپلو ماشومانو ته د ژبې زده کړې پروګرامونه پر مخ واچوي.
د اټکل له مخه اسټراليا کې شاوخوا ۱۵،۰۰۰ پښتانه ژوند کوي ولې ډيره کې دوی خپل ماشومان د مورنۍ ژبې او کلتور زده کړې ته نه هڅوي او همدا ده چې شته د پښتو ژبې ټولګي تش دي.
د اسټراليا تر ټولو لوی ښار سيدني کې دري او پښتو ژبو لپاره درې ښوونځي شتون لري ولې د ګوتو په شمير پښتانه زده کوونکي لري.
سيدني ښار د پښتو ژبې استاده عادله وايي، سره لدې چې ياد ښار کې زرګونه پښتانه اوسيږي ولې په شمار ايله څلور ماشومان پښتو ژبې زده کړې لپاره ښوونځي کې سبق وايي.
د مورنۍ ژبې ارزښت او پر وړاندې يې شته ستونزو ته مو کتنه کړې، بشپړه مرکه دلته واورئ.
