«د انجونو ښوونځي پرانیزئ» په نامه کمپاین اوس په ټرینډ بدل شوی.
په دغه کمپاین کې د سیاستوالو، خبریالانو، مدني فعالانو، ورزشکارانو او ښوونکو ترڅنګ بیلابیلو لورو برخه اخیستي او په یو غږ يې د افغانستان له سرپرست حکومت څخه غوښتي چې د انجونو پرمخ د ښوونځیو بندي دروازې پرانیزي، او زده کړي يې د ټول افغان انجونو حق بللی.
دغه هشټګ هغه ولسي غبرګون په ډاګه کوي چې د نجونو د زده کړو په اړه د وسله والو طالبانو پرېکړه ننګوي.
شاوخوا ۳۰۰ ورځې وشوې چې په افغانستان کې له شپږم ټولګي پورته انجونو ته د دې اجازه نه ده ورکړي شوي چې خپلو ښوونځیو ته ولاړې شي.
د طالبانو د حکومت همدې پرېکړې په کور دننه او بهر ډیر غبرګونونه را وپارول.
پر خواله رسنیو د دې کمپاین ځینو کډون کوونکو له اس بي اس راډیو سره په خبرو کې تعلیم د انجونو مسلم حق بولي او د افغانستان له سرپرست حکومت غواړي چې د انجونو تعلیم ته اجازه ورکړي.
داسې ښکاري چې له شپږم ټولګي پورته د نجونو د ښوونځیو په اړه طالب مشران هم یو خوله نه دي.
د بیلګې په توګه د طالبانو د بهرنیو چارو مرستیال شیر محمد عباس ستانکزي څرګندونې چې په وروستیو کې يې کړي ویلي، (مونږ ښځې له پام نشو غورځولی، ځکه دا د ټولنې مهم قشر دی، باید د افغانستان په بیا ودانولو کې، د افغانستان په سیاست کې او د افغانستان پر هره برخه کې فعاله ونډه ولري).
خو په کابل همدا یوه اوونۍ وړاندې د دیني عالمانو غونډه کې د طالبانو مشر ملاهبت الله اخندزاده بیا خپله اوږده وینا کې د نجونو زده کړو او د ښځو د کار په اړه هېڅ ونه ویل.
خو سره له دې ټولو موضوعاتو پر ټولنیز رسنیو د نجونو ښوونځیو پرانیزئ کمپاین یو شمېر زده کوونکې هېله منې کړي دي.
دوی هېله منې دي، چې دغه ډول کمپاینونه به د طالبانو چارواکي دې ته اړ کړي، چې د ټولو نجونو پرمخ ښوونځي پرانیزي.
لا نورو جزياتو لپاره بشپړ رپوټ واورئ.
