د کرونا ويروس وبا د نړۍ نږدې ټول هيوادونه اغيزمن کړي ولې بيا ډيرو هيوادونو کې کډوال او لږکۍ له لا ډيرو ستونزو سره مخ دي.
پاکستان د نږدې دوه نيم ميليونو افغان کډوال کور دی او هم ډير شمير افغان کډوال په پاکستان کې زيږدلي، ولې د کرونا وبا راتګ سره د عامو پاکستانيو پر پرتله افغان کډوال ډير د بې وسی احساس کوي او د مرستې نه ترلاسه کولو ستونزې ګالي.
خيبر پښتونخوا کې د افغان کډوالو متحده عالي شورا رئيس بريالی مياخيل له اس بي اس سره خبرو دوران کې وويل، افغان کډوال لکه نورو پاکستانيانو د عايد نورې لارې نه لري، نه ځمکه لري او نه لکه نورو پاکستانيانو تنخوا او يا روان کاروبارونه لري. افغان کډوال د لاس مزدوری باندې تکيه دي.
د ملګرو ملتونو کډوالو اداره بې وسه افغان کډوالو ته يوازې ۱۲۰۰۰ کلدارې ورکوي چې هغه هم تر اوسه له ۳۰،۰۰۰ لږو افغانانو ترلاسه کړي.
د مياخيل په وينا تر اوسه د پاکستان حکومت له افغان کډوالو سره مرسته نده کړې.
د مياخيل په وينا، د ملګرو ملتونو مرسته به يوازې ۶۰ يا ۷۰ زرو کورنيو سره وشي ولې اصل کې نږدې دوه نيم ميليونه افغانان مرستې ته اړتيا لري.
پاکستان کې د افغان کډوالو حال مو تاسو ته په رپوټ کې راخيستی، بشپړ رپوټ دلته واورئ.
