پاکستان چې په ځلونو د نړیوالې ټولنې او د افغانستان د مخکیني جمهوري نظام له لوري د ترهګرو خوندي پټڼ ځای یاد شوی، تازه صدراعظم يې شهباز شریف بیا ویلي، ترهګرې ډلې په افغانستان کې دي.
شهباز شریف د جمعې په ورځ د افغانستان په وخت شپه مهال په نیویارک کې د ملګرو ملتونو ۷۷ مې کلنۍ غونډې ته په وینا کې وویل چې هېواد يې له نړیوالې ټولنې سره یو ځای له افغانستانه د ترهګرو ډلو ، د ګواښونو په اړه اندېښنه لري.
نوموړي په خپله دغه وینا کې د یو شمېر تروریستي ډلو لکه د داعش خراسان څانګې، تحریک طالبان پاکستان، القاعده، د ختیځ ترکستان اسلامي حرکت او د اوزبیکستان اسلامي جنبش ډلو نومونه یاد کړل او ادعا يې وکړه چې دا ډلې افغانستان کې میشتې دي.
که څه هم شهباز شریف د خپلو خبرو د اثبات په پار هېڅ ډول ثبوت وړاندې نه کړ، خو په افغانستان کې له واکمنو طالبانو يې وغوښتل چې د دې ډلې د له منځه وړو لپاره جدي اقدام وکړي.
دا په داسې حال کې ده چې په وروستیو کې د پاکستان د بهرنیو چارو وزیر بلاول بوټو او ځینو نورو چارواکو هم ورته څرګندونې کړې.
د شهباز شریف دغه څرګندونې په کوردننه د افغان طالب چارواکو، پاکستاني طالبانو او د افغانستان د یو شمېر سیاسیونو غبرګونونه راپارولي دي.
د چارو ځیني شنونکي د پاکستان د لومړي وزیر دغو څرګندونو ته په غبرګون کې وايي، چې د ترهګرۍ اصلي مرکز پاکستان کې دی او دغه څرګندونې د نوې دسیسې ښکارندوي کوي چې باید مخه يې ونېول شي.
دوی وویل، پاکستان د نړۍ په خړ لېست کې ده او اوس د دې لپاره چې ځان له دې لیست څخه لرې کړي دغه تور په افغانستان اچوي.
یو شمېر نور شنونکي بیا په دې باور دي، چې پاکستان تل د افغانستان په بې ثباتې او مسایلو کې خپلې ګټې پورته کړي دي او طالبان باید په دې پوه شي چې پاکستان هېڅکله هم د دوی دوست نشي کیدی.
د افغانستان پخواني ولسمشر حامد کرزي هم د پاکستان د لومړي وزیر د خبرو په غبرګون کې د یوې اعلامیې په ترڅ کې وویل، چې افغانستان د ترهګرۍ قرباني دی او د ترهګرۍ مرکزونه له لسیزو راهیسې په پاکستان کې دي او د پاکستان تر مستقیم ملاتړ لاندې د افغانستان پر ضد کارول کیږي.
پدې اړه لا ډير معلومات په تيار شوي رپوټ کې واورئ.
