اسټراليا کې د افغاني فلمونو يوازينی فلم فستيوال سږ کال يو ځل بيا پر مخ اچول کيږي او يو شمير افغاني فلمونه اسټراليايانو ته نندارې ته وړاندې کيږي.
اسټراليا کې د غان (افغان) نړيوال فلم فيستوال له تيرو شپږو کلونو راهيسې په اډيليډ ښار کې د GIFFA ادارې په لاس پر مخ اچول کيږي.
ياد فستيوال په تيرو کلونو کې د اسټراليا يو شمير ښارونو کې پر مخ اچول کيده او سږ کال يوازې د اسټراليا دوه لويو ښارونو سيدني او اډيليډ کې له يو لړ مراسمو افغاني فلمونه نندارې ته وړاندې کوي.
د غان نړيوال فلم فستيوال يو له تنظيم کوونکو څخه محمد عارف حليمي دی، ښاغلی له اس بي اس پښتو خپرونې سره مرکه کې وويل، د ياد فستيوال تر شا ډيرې موخې دي ولې تر ټولو مهمه يې د کلتور وده او افغانانو په اړه نړيوالو ته انځور وړاندې کول دي.
د ياد فستيوال څخه راټولې شوې پيسې ټولې افغانستان کې بې وزلو کسانو ته استول کيږي.
د ښاغلي په وينا، افغان فلمونو مينه وال ډير دي.
ياد فستيوال سږ کال اډيليډ ښار کې د ډسمبر مياشت پر ۴ او ۶ نيټه او بيا په سيدني ښار کې د يکشنبې په ورځ د ډسمبر مياشت پر ۱۲ نيټه پر مخ اچول کيږي.
تاسې د ياد فلم فستيوال وخت او ټکټونو په اړه له GIFFA ويبپاڼې څخه معلومات ترلاسه کولی شئ.
