راتلونکی جمع د جولای مياشت پر ۳۱ نيټه به د لوی اختر لومړۍ ورځ وي.
د کرونا وبا د نړۍ پر مذهبي او غير مذهبي مراسمو او جشنونو يې ډير منفي اغيز شيندلې او سږ کال لوی اختر هم مسلمانان له جلا تدابيرو سره لمانځي.
اسټراليا کې هر ايالت ځانته جلا محدوديتونه او محدوديتونو کې نرمښت لري، دا پدې معنی ده چې ټول اسټراليا کې به مسلمانان لوی اختر د خپل ايالت تدابيرو سره سم لمانځي.
ښاغلی ډاکټر افتخار احمد وايي، اسټراليا کې بايد ټول روغتياي تدابير جدي ونيول شي ترڅو د يو بل ژوند ژغورل شي.
د افغانانو د جومات کميټې ويکټوريا ايالت کې د کرونا ويروس پر وړاندې د پوهاوې پروګرامونه پر مخ اچولي او شته تدابيرو کې د مسلمانو جماعت، د اختر لمونځ او داسې نورو مسايلو په اړه يې پيغامونه خپاره کړي.
د اسټراليا ويکټوريا ايالت کې جوماتونه تړل شوي ولې بيا نورو ايالتونو کې خلک ټاکلي شمير سره جوماتونو ته تللی شي.
د اختر لمونځ په اړه ښاغلی احمد وايي، د اختر لمونځ بايد د ايالتونو شرايطو سره سم ترسره شي او هغو سيمو کې چې د خلکو پر راټوليدو بنديز لګيدلی، مسلمانان کولی شي د اختر لمونځ په خپلو کورونو کې وکړي او حتی که کور کې يو کس هم وي هغه کولی شي د اختر لمونځ په يوازې وکړي.
دا او نور مهم معلومات په بشپړه مرکه کې واورئ.
