د دغه کاروان غړي یې په کلیو، جوماتونو او ښوونځیو کې د سولې لپاره له خلکو، قومي سپين ږیرو او ښوونکو سره ناستې لري.
په ورته وخت کې د مشرانو جرګې غړي د سولې په روانه پروسه کې د سولې د ولسي حرکت رول اغیزمن او هېله بخښوونکی ګڼي.
د سولې ولسي حرکت وروسته له هغه رامنځته شو چې په هلمند کې په یوه خونړۍ انتحاري حمله کې ملکیانو ته مرګ ژوبله واوښته.
د یاد حرکت غړي له هلمنده پلي کابل ته راغلل، د یو شمېر بهرنیو سفارتونو مخې ته یې پرلت وواهه او له شااوخوا دوه میاشتو وروسته لوڅي پښې او پلي بلخ ولایت ته ولاړل.
د دوی پیغام هر ځای ته په رسيدو دا و چې، په افغانستان کې جګره د پردیو د ګټو لپاره روانه ده او قرباني یې افغانان دي.
راپور له ناجیې ساپۍ اورئ.
