پاکستان کې حکومت نږدې ټول بنديزونه لرې کړي او خلک يې نورماله ژوند کولو ته رابللي ولې داسې برخې لکه، هوټلونه، لويې غوندې او هم د زده کړې څانګې لا تر اوسه ندي پرانيستل شوي او حکومت پلان لري چې د اګيسټ مياشت تر نيمايي پورې دا برخې هم پرانيزي.
د قبايلو زرګونه زده کوونکي چې ښونځيو او پوهنتونو کې زده کړې کوي د پاکستان نورو ښارونو او سيمو پر پرتله له جلا ستونزې سره مخ دي او دا ستونزه دقبايلو کې د انټرنيټ نشتوالی دی.
د پاکستان امنيتي ادارو قبايلو سيمو کې انټرنيټ تړلی او وجه يې يادو سيمو کې نا امنې په ګوته کوي، ولې بله خوا قبايلو اوسيدونکي وايي، دوی ډير ځپل شوي او کيدای شي حکومت ويره لري ترڅو د قبايلو حقيقي انځور نورې نړۍ ته خپور نه کړي.
بله خوا قبايلو کې کرونا ويروس په اړه پيغامونه هم يوازې راډيو له لارې خلکو ته ورکول کيږي او قبايلي اوسيدونکي نشي کولی ترڅو انټرنيټ له لارې معلوماتو ته لاسرسی ولري.
پارلمان کې د قبايلو استازی اقبال افريدي وايي، اوسمهال امنيتي ستونزو له امله شونې نده چې قبايلو سيمو کې انټرنيټ فعال شي.
يو قبايلي زده کوونکي د انټرنيټ نشتوالي مسله يې د پاکستان سترې محکمې ته وړاندې کړه او محکمې پر چارواکو غږ وکړ ترڅو دې دا مسلي جدي وڅيړي ولې د محکمې غوښتنې ځواب کې د پاکستان پوځ ويلي، دا مهال قبايلو سيمو ته امنيتي مسايلو له امله انټرنيټ نشي ورکولی.
زما همکار اسلام ګل افريدي له قبايلي زده کوونکو سره خبرې کړي او د هغوی غږونه يې راخيستي چې تاسې دا ټول پدې تيار شوي رپوټ کې اوريدلی شئ.
