څو ورځې وړاندې د پاکستان دير سيمې عبدالمالک چې اسټراليا کې د کډوال په توګه يې ژوند کاوه او تر اوسه يې د اسټراليا دايمي ويزه نه وه ترلاسه کړې ورپيښې ناروغۍ له امله ومړ.
مرحوم عبدالماک په سيدني ښار کې د کورنۍ نږدې غړي نه لرل ولې له مړينې وروسته د هغه جسد پاکستان ته ليږدولو لپاره نورو خلکو د پيسو مرستو راټولول پيل کړل.
د عبدالمالک د جسد ليږد برخه کې ګڼو پښتنو مرسته وکړه او د هغه نږدې دوستانو څخه فيض الله افريدی چې خپله پوهنتون کې د PHd زده کړې کوي د خپل اسټراليايي مشر په مرسته يې په ۲۴ ساعتونو کې ۱۹۰۰۰ ډالرو مرسته راټوله کړه.
همداسې ورته نورې مرستې د پښتنو ټولنو استازو هر يو انور خان، زين دلزاک، رحم جليلي او نورو لخوا راټولې شوې. راټولې شوې پيسې شاوخوا ۳۰،۰۰۰ ډالر دي او دا پيسې د عبدالمالک جسد ليږد او کورنۍ سره يې مرستې لپاره ورکول کيږي.
د مرحوم عبدالمالک نږديې ملګری ښاغلي رحم جليلي له اس بي اس پښتو خپرونې سره خبرو پر مهال وويل، تر اوسه د مرحوم عبدالمالک جسد پاکستان ته ندی استول شوی ولې د ځينو سفارتونو لخوا د هغه اسنادو مسلې حل وروسته به جسد پاکستان کې د مرحوم کورنۍ ته سپارل کيږي.
لا ډير معلومات د رحم جليلي په مرکه کې واورئ.
