د افغانستان ديني عالمانو پر وسله والو طالبانو د سولې له پروسې سره د يوځای کېدو او دغه راز يې په قومونو د يووالي غږ وکړ.دیني عالم مولوي عبدالظاهر حقاني وويل، چې هدف يې پر وسله والو د سولې غږ کول، له قومونو د يووالي غوښتنه او حکومت ته د سولې پروسې پر وړاندې د موجوده خنډونو د لرې کولو غږ کول دي.مولوي عزت الله عزتمند وويل، دا د ديني عالمانو يو مسوليت دی، چې د حکومت او وسله والو مخالفينو ترمنځ د سولې لپاره زمينه برابره کړي.يو بل ديني عالم مولوي عبدالغفار وويل، قومي ، ژبني او سمتي تعصباتو ته لمن وهل د اسلام له نظره ناسمه کړنه ده او بايد له يادې چارې مخنيوی وشي.دیني عالمان په يوه غږ وويل، چې تر دې وروسته به د ممبرونو له لارې سولې ته کار کوي او وسله وال مخالفين به دې ته هڅوي، چې د سولې له پروسې سره يوځای شي.عبدالروف ځاځي د ديني عالمانو غږونه راخيستي چې دلته يې بشپړ رپوټ اوريدلی شئ.
شریکول
