د وسله والو طالبانو لخوا له افغان شخصیتونو سره د تماس کمېسون په بلنه یو شمېر پخواني چارواکي بېرته خپل هېواد ته راستانه شوي. خو منتقدین له دې چارې په نیوکې سره وايي، له سیاسي جوړجاړي پرته ددغو کسانو ستنیدل به کومه اغیزه ونلري.
له تیرې یوې میاشتې راپدیخوا د وسله والو طالبانو هغه کمېسیون رسماً په کار پیل کړی ترڅو بهر ته تللي پخواني چارواکي او سیاستوال افغانستان ته د بېرته را ستنېدو لپاره وهڅوي.
د دې کمېسیون مشري د دې ډلې د سرپرست حکومت د کانونو او پترولیم وزیر شهاب الدین دلاور کوي، دا کمېسیون د دوه نورو وزیرانو په ګډون څو تنه غړي لري.
ظاهراً دا کمیسیون د هغو مشرانو د پخلاکولو په پار جوړ شوي چې په تېر جمهوري نظام کې د نفوذ خاوندان وو او اوس اکثریت د افغانستان په ګاونډیو هېوادونو په ځانګړې توګه ترکیه کې میشت دي.
طالب چارواکو په تېره کې ویلي چې بهر ته تللي شخصیتونه افغانان دي او هېواد ته يې بېرته راتک ضروري دی دوی به ورته بلنه ورکړې چې بېرته هېواد ته راستانه شي.
د وسله والو طالبانو له لوري افغان شخصیتونو سره د اړیکو کمېسیون د کار له پیلېدو سره تر دا مهاله یو شمېر پخواني چارواکي چې د تېر جمهوري نظام په سقوط کې له هېواد څخه وتلي وو بېرته هېواد ته ستانه شوي دي.
مهرباني وکړئ، پدې اړه لا ډېر جزئیات په رپوټ کې واورئ.
