د طالبانو مشر ملا هبت الله اخندزاده په خپل اختریز پیغام کې ویلي؛ د افغان ښځو ټول حقوق یوازې په نکاح او میراث پورې محدودی شوي او زیاته کړې وه چې د طالبانو له حاکمیت وروسته؛ د میرمنو اجباري نکاح او په بدو کې يې ورکولو په شمول له نورو ګڼو راوجې ظلمونو څخه د ژغورولو په پار لازم اقدمات اخېستل شوي دي.
ملا هبت الله په خپل دې پیغام کې سربېره پر دې چې ښځې د ټولنې د نیمايي برخې په توګه یاد کړې وي خو له دې سره سره يې د هغوي د زده کړو مسله چې د طالبانو له حاکمیت راپدیخوا په کور دننه او نړیواله سطح غبرګونونه راپارولي څه نه دي ویلي.
په پیغام کې دې موضوع ته په اشارې سره راغلي چې د ټولنې د نیمې برخې په توګه د میرمنو اصلاح، حجاب، عفت، له اختلاط څخه مخنیوي او د اسلامي شریعت تر سیوري لاندې د باسعادته ژوند په مسیر د برابرولو په موخه لازم اقدامات شوي دي.
د طالبانو د مشرتابه پیغام کې دا هم راغلي" د ښځو نورو حقونو د تامین په برخه کې ټول ادارت د میرمنو په مرسته مکلف شوي دي." خو دا یادونه يې نه ده کړې چې نور کوم حقونه او ایا د نجونو او ښځو د زده کړو او کار حق ته يې هم حکومت څه پام کوي او که نه؟
د طالبانو مشرتابه دغو څرګندونو ته په غبرګون کې یو شمېر افغان نجونې او میرمنې بیا وايي، چې طالبانو د دوی اساسي حقونه ورڅخه اخیستي او ورځ تر بلې پرې د ژوند کړۍ تنګه وي.
دوی زیاته کړه، د طالبانو له راتګ وروسته د انجونو پر وړاندې د ښوونځیو او پوهنتونو دروازو تړل کېدو سربېره ښځې له کار کولو راګرځول شوي دي.
پدې اړه کابل څخه بشپړ رپوټ واورئ.
