د اسټراليا حکومت په افغانستان کې د خپلو ځانګړو ځواکونو ادعا شوي جنګي جنايتونو څخه پرده پورته کول او له افغانانو ژوره بښنه غوښتل له بيلابيلو غبرګونو سره مل ده.
د ياد رپوټ موندې ډيرو لپاره حيرانونکې وې ځکه لومړنيو موندنو کې د ۳۹ بې ګناه افغانانو د وژل خبر ورکوي ولې د د لا نورو ورته پيښو را برسيره کيدو خبر هم کيږي.
د اسټراليا حکومت لخوا د پوځيانو پلټنې له ګام څخه طالبانو هر کلی کړی او له اسټراليا حکومت څخه يې د يادو پيښو پلټنې او عاملينو ته سزا ورکولو غوښتنه کړې.
اس بي اس پښتو خپرونې سره خبرو پر مهال د طالبانو وياند ډاکټر نعيم وويل، افغانستان ته د بهرني پوځيانو راتګ له پيل څخه غير اصولي کار وه.
د ښاغلي نعيم پر بهرنيو پوځيانو د لا ډيرو افغانانو وژنې او د هغوی کورونو او يا ودونو بمبارولو تور لګول کيږي او وايي داسې ورته ډيرې پيښې شتون لري.
قطر کې د طالبانو وياند ډاکټر نعيم وايي، د اسټراليا حکومت بايد له قرباني شوو کورنيو سره وګوري او له هغوی دې پوښتنه وکړي چې هغوی څه غواړي.
د افغان دولت او ځينو نړيوالو بشري حقونو ادارو معلوماتو له مخه په افغان جګړه کې ښکيلو ډلو جنګي جنايتونه ترسره کړي.
بله خوا د روان کال جون مياشت کې د امریکا ولسمشر ډونلډ ټرمپ په هاګ کې د نړیوالې جنايي محکمې پر هغو قضايي چارواکو بندیزونه ولګول څوک چې دا پلټي چې ايا امريکايي ځواکونو په افغانستان کې جنګي جرمونه کړي او که نه ؟
نړیواله جنايي محکمه د امریکا دا پرېکړه د دې ادارې د قانون حاکمیت او قضایي چارو کې د نه منوونکې لاسوهنې هڅه بولي.
ډاکټر نعيم وايي، افغان جګړه د ښکيلو ټولو غاړو د جنګي پلټنو ملاتړ کوي او وايي، که دا جرم هر چا ترسره کړی وي پلټنه دې وشي.
تاسې کولی شئ له اس بي اس پښتو خپرونې سره د ښاغلي ډاکټر نعيم بشپړه مرکه دلته واورئ.
