اس بي اس پښتو خپرونې په قطر کې د طالبانو وياند سهيل شاهين سره مرکه کړې او د سولې پروسې او همدا رنګه نورو اړوندو موضوعاتو په اړه يې د طالبانو نظر غوښتی.
د بين الافغاني سولې خبرو لړۍ وخت نا وخته له ځينو خنډونو سره مخ کيږي او يو ستر خنډ د ټولو هغو طالب بنديانو نه خوشې کول دي کوم چې د امريکا او طالبانو ترمينځ پرې هوکړه شوې او د لويې جرګې پريکړې او د افغان ولسمشر محمد اشرف غني فرمان وروسته بايد خوشې شوي وای.
طالب بنديانو کې ځيني داسې کسان هم شته کوم چې د بهرنيو ځواکونو پر وژنه محکوم دي او د همدې هيوادونو فشارونو له امله دا بنديان تر اوسه ندي خوشې شوي.
د اسټراليا لومړي وزير سکاټ موريسن د اګيسټ مياشت په ۹ نيټه وويل "حکمت الله د دريو اسټراليايي پوځيانو پر وژنه محکوم شوی او نوموړی بايد هيڅکله له زندان څخه خوشې نشي."
ښاغلي زياته کړه "مونږ پدې باور نه يو چې د حکمت الله خوشې کيدو سره به سيمه کې امن راشي. دا زمونږ دريځ دی او دا دريځ به دوامداره او کلک ساتو."
د اسټراليا لومړي وزير سکاټ موريسن څرګندونو په ځواب کې د طالبانو وياند سهيل شاهين اس بي اس پښتو خپرونې ته وويل " حکمت الله په اړه د اسټراليا د حکومت دريځ د بين الافغاني سولې خبرو پر وړاندې خنډ جوړ کړی او دا خبرې يې درولي."
Hekmatullah, the Afghan soldier who killed three Australian troops. Source: Four Corners
د ښاغلي شاهين په وينا، د طالب زندانيانو ليست له امريکا سره تر هوکړې دوه مياشتې مخکې له امريکايي چارواکو سره شريک شوی وه چې بيا دا ليسټ امريکا له افغان حکومت او نورو بهرنيو هيوادونو سره شريک کړ.
ښاغلي شاهين زياته کړه، "که چيرې خبر د حساب ورکولو شي، سلګونه او زرګونه افغانان د همدوی له وجې وژل شوي او اسټراليا دې لومړی دې ته ځواب ورکړي."
د افغانستان امنيت شورا وياند جاويد فيصل اس بي اس پښتو خپرونې ته ويلي، د طالبانو نږدې ټول زندانيان خوشې شوي او طالبان دې هم خپل ژمنه پوره کړي او پاتې افغان حکومت زندانيان خوشې کړي.
ښاغلي فيصل زياته کړه " له نورو هيوادونو سره دوه اړخيزې او هم درې اړخيزې خبرې روانې دي او دا خبرې دې لپاره نه کيږي چې د زندانيانو خوشې کولو پر مسلې فشار وارد شي بلکې دې لپاره چې دا درک شي د يادو زندانيانو په اړه بهرني هيوادونه څه دريځ لري."
د حکمت الله خوشې کيدو په اړه ښاغلي فيصل وويل، " افغان حکومت له اسټراليا سره پر خپل همکاری او ملګرتوب ژمن دی او د اسټراليا حکومت او د قرباني شوو اسټراليايانو کورنيو خوښې او رضا پرته حکمت الله نه خوشې کوي."
د طالبانو وياند سهيل شاهين په وينا، افغان حکومت زندانو کې ۱۶،۰۰۰ طالبان بنديان ول او له ۵۰۰۰ طالب بنديانو خوشې کولو سره بيا هم ۱۱،۰۰۰ د حکومت زندانو کې پاتې کيږي.
Source: GMIC
ښاغلی وايي، د بين الافغاني خبرو پيل وروسته دريو مياشتو کې د نورو زندانيانو تبادله کيږي.
اس بي اس پښتو خپرونې د اسټراليا بهرنيو چارو او سوداګرۍ وزارت څخه د بنديانو تبادلې په اړه نظر وغوښت ولې له هغوی څخه يې کوم ځواب ترلاسه نه کړ.
