د امریکا او طالب چارواکو ترمنځ دغه دوه ورځنۍ غونډه چې د بندو دروازو ترشاه تر سره شوه د افغانستان لپاره د امریکا ځانګړي استازي ټام ویسټ، د افغان ښځو او بشري حقونو په چارو کې د امریکا ځانګړې استازې رینا امیري او د طالبانو د سرپرست حکومت د بهرنیو چارو وزیر امیر خان متقي په مشرۍ پلاوي پکې ګډون درلود.
دغه ناسته چې د یکشنبې په ورځ پیل شوې وه پرون ناوخته پای ته ورسېده.
د طالبانو سرپرست حکومت د یادې غونډې تر پای ته رسېدو وروسته د یوې خبرپاڼې په خپرولو وویل، چې پلاوی يې په دې ناسته کې له امریکايي لوري وغوښتل څو له تورلېستونو د طالب مشرانو نومونه وباسي او پرخپلو پښو د اقتصاد درولو په موخه د افغانستان بانکي زیرمي ازادي کړي.
خبرپاڼه کې راغلي ول، په دې ناسته کې د داوړو لوریو ترمنځ د باور جوړونې او په دې برخه کې د عملي ګامونو اخیستلو، د تورو لېستونو او بندېزونو لیرې کولو، د افغانستان د اقتصادي ثبات ساتلو، د مخدره توکو پر ضد د مبارزې، د نړۍ هره برخه کې افغانانو ته د قونسلي خدماتو رسولو او بشري حقونو پر موضوعاتو هم خبرې وشوې.
د طالبانو په خپرپاڼه کې دا هم راغلي ول، چې دواړو لوریو په خپلو منځو کې د باور جوړونې په موخه د ورته ناستو پر دوام ټینګار وکړ.
د قطر پلازمېنه دوحه کې د امریکا او طالب پلاوی ترمنځ دغه ناسته په داسې حال کې ترسره کیږي چې افغانان د دواړو لوریو ترمنځ خبرې اترې مهمې بولې او خپلې هیلې ورسره تړي، خو د چارو یو شمېر شنونکي کې بیا ددغې ناستې په اړه بېلابېل لید لوري لري.
لا ډير نور کابل څخه زمونږ خبريال رحيم الدين اورياخيل په رپوټ کې واورئ.
