هر کال زرګونه کډوال د استرالیا د تابعیت ترلاسه کولو لپاره خپل غوښتنلیکونه د کورنیو چارو وزارت ته سپاري خو له دې ډلې څخه د ۷۵ سلنه کسانو غوښتنلیکونه په ۱۸ میاشتو کې ارزول کیږي.
په تېر مالي کال کې نېږدې ۲۰۰ زره کسانو د استرالیا تابعیت ترلاسه کړی او له ۲۰۰ زره څخه زیات کسان اوس هم د انتظار په حال کې دي.
د استرالیا د کورنیو چارو وزارت مسولین وايي چې په تېر یوه کال کې د شاوخوا ۲ زره افغانانو غوښتنلیکونه ارزول شوي او د استرالیا تابعیت ورکړل شوی دی.
د یادولو وړ ده چې له ۱۹۴۹ کال را پدېخو له ۵ میلیونو څخه زیاتو کسانو د استرالیا تابعیت ترلاسه کړی او اوسمهال د استرالیا له ۲۵ سلنه څخه زیات اوسېدونکي داسې کسان دي چې له استرالیا څخه بهر په نورو هېوادونو کې پیدا شوي دي.
