مرګ حق دی او يو انسان هر وخت له مرګ سره مخ کيدای شي ولې ډيره کې مونږ او تاسو لږ د همدې ناڅاپي حالت په اړه سوچ کوو.
په اسټراليا کې مرګ، د مړي خاورو ته سپارل او د فاتحې مراسم له هغو ځايونو سره توپير لري، له کومو چې مونږ دلته اسټراليا ته راغلي يو.
که چېرې یو کس په اسټراليا کې مړ کېږي، نو د نوموړي کس د کورنۍ غړي او يا دوستان بايد پر ځينو مسايلو پوه شي ترڅو هغه سخت وخت کې د ځينو لږښتونو او نورو تړلو مسايلو له وجې حيرانتيا غوره نه کړي.
دا خبره کېدای شي، د ډېرو نویو راغلو کسانو لپاره په زړه پورې وي چې په اسټراليا کې د يوه قبر د ځمکې قيمت لس زرو ډالرو ته رسېږي او يو قبر څلور منزلو پورې کېندل کېږي او په هر يو منزل کې يې يو مړی ښخ کېږي.
د اسټراليا هر يو ښار کې د افغانانو ټولنې، ډيره کې د مړي سمبالښت او ورسره تړلي مسايل مخ ته وړي. يادو ټولنو له ځينو هديرو سره قراردادونه لاسلیک کړي او د مسلمانانو په ځانګړو هديرو کې مړي خاورو ته سپارل کېږي.
د اسټراليا په وېکټوريا ايالت کې د افغان اسلامي مرکز او عمر فاروق جومات د کمېټې مشر ښاغلي پاچا نوري، له اس بي اس پښتو راډیو سره په مرکې کې ویلي، که چېرې په اسټراليا کې افغانان مړه کېږي نو د افغانانو ټولنې لخوا د هغوی د مړي د سمبالښت چارې د نورو ټولنو په پرتله په ډېر ښه ډول سره ترسره کېږي.
کله چې یو کس په اسټراليا کې مړ شي نو د نوموړي جسد له مړینه وروسته دلته اسټراليا کې خاورو ته سپارل کېږي او يا د مړي جسد خپل اصلي کور ته له اسټراليا څخه بهر ليږل کېږي.
اس بي اس پښتو راډیو ، په وېکټوريا ايالت کې د افغان اسلامي مرکز او عمر فاروق جومات د کميټې له مشر ښاغلي پاچا نوري سره د مړو د سمبالښت او ورسره تړلو مسایلو په اړه په جزیاتو خبرې کړي. تاسو کولای شئ، لا ډېر معلومات په مرکې کې واورئ.
