له سرطان سره د مبارزې نړیواله ورځ هر کال د فبرورۍ په څلورمه نېټه په ټوله نړۍ کې لمانځل کیږي او خلکو ته له سرطان ناروغۍ څخه د مخنیوي په اړه عامه پوهاوی ورکول کېږي.
دغه ورځ چې له ۲۰۰۶ م کال راپدېخوا لمانځل کېږي، په هغې کې د دې ناروغۍ په برخه کې د نورو څېړنو او د هغې د نورو درملنو په اړه بحثونه کیږي.
د روغتیا نړیوال سازمان د معلوماتو له مخې نړۍ کې په سرطان ناروغۍ د اخته کسانو شمېر ډیر شوی، چې ډیری د سږو، کولمې او معدې، ینې او سینې په سرطان اخته دي.
د روغتیا نړیوال سازمان په خپل تازه راپور کې وړاندوینه کړې چې تر ۲۰۵۰ کال پورې به د سرطان نوې پیښې ۷۷ سلنه زیاتوالي ومومي او ۳۶ میلیونو ته به ورسیږي.
دا په داسې حال کې ده چې په ۲۰۲۲ میلادي کال کې نړۍ کې د سرطان اټکل شوې پیښې ۲۰ میلیونه او مړېنه يې ۹.۷ میلیونه وه او په ۲۰۲۰ کال کې بیا د سرطان پیښې ۱۸ میلیونه اټکل شوي وي.
د روغتیا نړیوال سازمان په خپل راپور کې چې د سرطان نړیوالې ورځې په مناسبت خپور کړی، وړاندوینه کړې، چې خورا پرمختللي هېوادونه به په راتلونکو ۲۵ کلونو کې د سرطان په پيښو کې تر ټولو لوی مطلق زیاتوالي تجربه کړي.
راپور کې راغلي، چې لږ پرمختللي هېوادونه کې به د سرطان د پیښو کچه تر دې هم لوړ وي چې ښايې د دوی په روغتايي سیستمونو ناوړه اغېز وکړي.
په دغه راپور کې د روغتیا نړیوال سازمان د سرطان د څارنې مرکز د مشر له قوله ویل شوي، تمه ده د نړۍ نفوس له اته میلیارده څخه تر ۲۰۵۰ کال پورې نږدې لس میلیارده ته لوړ شي چې دا به د سرطان د نویو پیښو شمیر کې زیاتوالی راولی.
د روغتیا نړیوال سازمان په راپور کې تنباکو، الکول او چاغوالی په نړۍ کې د سرطان د پیښو د زیاتوالي عمده عوامل بلل شوي او د هوا ککړتیا د چاپیریال د خطر لوی عامل بلل کیږي.
مهرباني وکړئ لا ډېر جزیات په رپوټ کې واورئ.
