ਆਸਟ੍ਰੇਲੀਆ ਦੀ ਨਾਗਰਿਕਤਾ ਲਈ ਲਾਜ਼ਮੀ ਇਮਤਿਹਾਨ ਵਿੱਚ ਦੇਸ਼ ਦੀ ਜਨਸੰਖਿਆ ਬਾਰੇ ਪੁੱਛੇ ਇੱਕ ਸੁਆਲ ਦੇ ਜੁਆਬ ਲਈ ਦਿੱਤੇ ਗਏ ਤਿੰਨੋ ਵਿਕਪ ਗ਼ਲਤ ਹੋਣ ਦਾ ਬਿਨੈਕਾਰਾਂ ਦੇ ਆਸਟ੍ਰੇਲੀਆ ਦੀ ਨਾਗਰਿਕਤਾ ਹਾਸਿਲ ਕਰਨ ਦੀ ਸੰਭਾਵਨਾ ਤੇ ਮਾਰੂ ਪ੍ਰਭਾਵ ਹੋ ਸਕਦਾ ਹੈ।
ਬ੍ਰਿਟੇਨ ਦੇ ਨਾਗਰਿਕ ਇੱਕ ਔਰਤ ਨੇ ਇਸੇ ਹਫਤੇ ਨਾਗਰਿਕਤਾ ਦਾ ਇਮਤਿਹਾਨ ਦਿੱਤਾ ਹੈ। ਉਸਨੇ ਪਛਾਣ ਨਾ ਦੱਸਣ ਦੀ ਸ਼ਰਤ ਤੇ ਪੇਪਰ ਦੀ ਇਸ ਗ਼ਲਤੀ ਨੂੰ ਐਸ ਬੀ ਐਸ ਨਿਊਜ਼ ਦੀ ਜਾਣਕਾਰੀ ਵਿੱਚ ਲਿਆਉਂਦਾ ਹੈ।
ਉਸ ਔਰਤ ਨੇ ਦੱਸਿਆ ਕਿ ਉਸਨੇ ਇਮਤਿਹਾਨ ਦੀ ਚੰਗੀ ਤਿਆਰੀ ਕੀਤੀ ਸੀ ਜਿਸ ਦੇ ਲਈ ਉਸਨੇ ਆਸਟ੍ਰੇਲੀਅਨ ਸਿਟੀਜ਼ਨਸ਼ਿਪ: ਆਵਰ ਕਾਮਨ ਬਾਂਡ ਨਾਂ ਦੀ ਬੁੱਕਲੈਟ ਨੂੰ ਪੜਿਆ ਸੀ ਜਿਸ ਦੀ ਕਿ ਹੋਮ ਅਫੇਯਰ ਵਿਭਾਗ ਵੱਲੋਂ ਸਿਫਾਰਿਸ਼ ਕੀਤੀ ਜਾਂਦੀ ਹੈ।
ਇਸ ਬੁੱਕਲੈਟ ਵਿੱਚ ਆਸਟ੍ਰੇਲੀਆ ਦੀ ਜਨਸੰਖਿਆ 24 ਮਿਲੀਅਨ ਦੱਸੀ ਗਈ ਹੈ।
ਪਰੰਤੂ, ਇਸ ਔਰਤ ਨੇ ਐਸ ਬੀ ਐਸ ਨਿਊਜ਼ ਨੂੰ ਦੱਸਿਆ ਕਿ ਪੇਪਰ ਦੇ ਛੇਵੇਂ ਸਵਾਲ ਜਿਸ ਵਿੱਚ ਆਸਟ੍ਰੇਲੀਆ ਦੀ ਜਨਸੰਖਿਆ ਬਾਰੇ ਪੁੱਛਿਆ ਗਿਆ ਸੀ - ਤੇ ਜੁਆਬ ਲਈ ਦਿੱਤੇ ਤਿੰਨ ਵਿਕਲਪਾਂ ਵਿੱਚ 24 ਮਿਲੀਅਨ ਹੈ ਹੀ ਨਹੀਂ ਸੀ।
ਉਸਨੇ ਕਿਹਾ: " ਮੈਨੂੰ ਬੁੱਕਲੈਟ ਵਿੱਚ ਪੜ੍ਹਨ ਕਾਰਨ ਯਾਦ ਸੀ ਕਿ ਉੱਤਰ 24 ਮਿਲੀਅਨ ਹੈ.. . ਪਰੰਤੂ ਵਿਕਲਪਾਂ ਵਿੱਚ ਇਹ ਹੈ ਹੀ ਨਹੀਂ ਸੀ। ਜੁਆਬ ਲਈ ਤਿੰਨ ਵਿਕਲਪ ਸਨ 18 ਮਿਲੀਅਨ, 22 ਮਿਲੀਅਨ ਅਤੇ 30 ਮਿਲੀਅਨ।"
ਔਰਤ ਨੇ ਆਪਣਾ ਹੱਥ ਖੜਾ ਕੀਤਾ ਅਤੇ ਐਗਜ਼ਾਮੀਨਰ ਨੂੰ ਦੱਸਿਆ ਕਿ ਉਸਨੂੰ ਪਤਾ ਹੈ ਕਿ ਉੱਤਰ 24 ਮਿਲੀਅਨ ਹੈ।
"ਮੈਂ ਉਸਨੂੰ ਕਿਹਾ ਕਿ ਪੇਪਰ ਵਿੱਚ ਗ਼ਲਤੀ ਹੈ ... ਉਸਨੇ ਕਿਹਾ ਕਿ 22 ਮਿਲਿਆਂ ਸਹੀ ਉੱਤਰ ਹੈ। "
"ਉਸਨੇ ਕਿਹਾ ਕਿ ਸਿਸਟਮ ਨੂੰ ਅਪਡੇਟ ਕਰਨਾ ਬੜਾ ਮੁਸ਼ਕਿਲ ਹੈ ਅਤੇ ਉਸਨੂੰ ਇਸ ਗ਼ਲਤੀ ਤੇ ਕੋਈ ਹੈਰਾਨੀ ਨਹੀਂ ਹੋਈ। "
ਇਸਤੇ ਔਰਤ ਨੇ ਜੁਆਬ ਵਿੱਚ 22 ਮਿਲੀਅਨ ਲਿਖਿਆ ਅਤੇ ਉਸਨੇ ਟੈਸਟ ਪਾਸ ਕਰ ਲਿਆ। ਪਰੰਤੂ ਉਸਨੇ ਕਿਹਾ ਕਿ ਇਹ ਬੜਾ ਹੀ ਅਜੀਬ ਤਜ਼ਰਬਾ ਸੀ।
ਉਸਨੂੰ ਜ਼ਿਆਦਾ ਚਿੰਤਾ ਪੇਪਰ ਵਿੱਚ ਇਸ ਗ਼ਲਤੀ ਦੇ ਹੋਰਨਾਂ ਲੋਕਾਂ ਤੇ ਹੋਣ ਵਾਲੇ ਅਸਰ ਦੀ ਸੀ।
"ਇਹ ਮੈਨੂੰ ਸੋਚਣ ਤੇ ਮਜਬੂਰ ਕਰਦਾ ਹੈ ਕਿ ਮੈਨੂੰ ਪਤਾ ਹੈ ਕਿ 22 ਮਿਲੀਅਨ ਗਲਤ ਹੈ , 18 ਮਿਲੀਅਨ ਵੀ ਗ਼ਲਤ ਹੈ.. ਤੇ ਮੈਂ 30 ਮਿਲੀਅਨ ਵੀ ਲਿਖ ਸਕਦੀ ਸੀ। "
ਨਾਗਰਿਕਤਾ ਟੈਸਟ ਤੱਕ ਪਹੁੰਚਣ ਲਈ ਬਿਨੈਕਾਰਾਂ ਨੂੰ ਕਈ ਸਾਲ ਦਾ ਸਮਾਂ ਲੱਗਦਾ ਹੈ।
ਟੈਸਟ ਵਿੱਚ 20 ਸੁਆਲ ਪੁਛੇ ਜਾਂਦੇ ਹਨ। ਤੇ ਇਸਨੂੰ ਪਾਸ ਕਰਨ ਲਈ 15 ਸੁਆਲਾਂ ਦਾ ਸਹੀ ਜੁਆਬ ਦੇਣਾ ਜ਼ਰੂਰੀ ਹੈ।
"ਕਿੰਨੇ ਹੀ ਵਿਅਕਤੀ ਇਸ ਸੁਆਲ ਕਾਰਨ ਟੈਸਟ ਵਿੱਚ ਫੇਲ ਹੁੰਦੇ ਹੋਣਗੇ " ਉਸਨੇ ਕਿਹਾ।
"ਇਹ ਗ਼ਲਤੀ ਬਿਲਕੁਲ ਸ਼ਰਮਨਾਕ ਹੈ। "
ਆਸਟ੍ਰੇਲੀਆ ਦੀ ਅਬਾਦੀ ਸਿਤਮਬਰ 2017 ਵਿਚ 24,702,900 ਸੀ। ਇਹ ਸਾਲ 2009 ਵਿਚ 22 ਮਿਲੀਅਨ ਹੋਈ ਸੀ, 2013 ਵਿੱਚ ਇਸਨੇ 23 ਮਿਲੀਅਨ ਦਾ ਅੰਕੜਾ ਪਾਰ ਕੀਤਾ ਅਤੇ 2016 ਦੇ ਸ਼ੁਰੂ ਵਿੱਚ ਇਸਨੇ 24 ਮਿਲੀਅਨ ਨੂੰ ਛੂਹਿਆ।
ਕਈ ਹੋਰ ਬੋਲੀਆਂ ਵਿੱਚ ਅਨੁਵਾਦਿਤ ਆਸਟ੍ਰੇਲੀਅਨ ਸਿਟੀਜ਼ਨਸ਼ਿਪ: ਅਵਰ ਕਾਮਨ ਬਾਂਡ ਬੁੱਕਲੈਟ ਵਿੱਚ ਵੀ ਇਹ ਗ਼ਲਤੀ ਹੈ। ਇੰਡੋਨੇਸ਼ੀਅਨ, ਇਟਾਲੀਅਨ, ਫਰੇਂਚ ਅਤੇ ਅਰਬੀ ਬੋਲਿਆ ਵਾਲੀ ਬੁੱਕਲੈਟ ਵਿੱਚ ਆਸਟ੍ਰੇਲੀਆ ਦੀ ਅਬਾਦੀ 22 ਮਿਲੀਅਨ ਦੱਸੀ ਗਈ ਹੈ।
ਹੋਮ ਅਫੇਯਰ ਵਿਭਾਗ ਦੇ ਇੱਕ ਬੁਲਾਰੇ ਨੇ ਕਿਹਾ :"ਨਾਗਰਿਕਤਾ ਇਮਤਿਹਾਨ ਦੀ ਇੱਕਸਾਰਤਾ ਬਰਕਰਾਰ ਰੱਖਣ ਲਈ ਜ਼ਰੂਰੀ ਹੈ ਕਿ ਸਾਰੇ ਸੁਆਲ ਅਤੇ ਜੁਆਬ ਗੁਪਤ ਰੱਖੇ ਜਾਨ। ਇਸ ਲਈ ਵਿਭਾਗ ਨਾਗਰਿਕਤਾ ਟੈਸਟ ਵਿੱਚ ਸੁਆਲਾਂ ਬਾਰੇ ਹੋਰ ਕੋਈ ਟਿੱਪਣੀ ਨਹੀਂ ਕਰ ਸਕਦਾ। "
ਐਸ ਬੀ ਐਸ ਨਿਊਜ਼ ਨੇ ਵਿਭਾਗ ਨੂੰ ਟੈਸਟ ਵਿੱਚੋਂ ਫੇਲ ਹੋਣ ਵਾਲੇ ਲੋਕਾਂ ਦੀ ਗਿਣਤੀ ਬਾਰੇ ਸੁਆਲ ਕੀਤਾ।
ਜਿਸ ਤੇ ਬੁਲਾਰੇ ਨੇ ਦੱਸਿਆ " 1 ਜੁਲਾਈ 2017 ਤੋਂ 30 ਅਪ੍ਰੈਲ 2018 ਦੌਰਾਨ ਟੈਸਟ ਦੇਣ ਵਾਲਿਆਂ ਵਿਚੋਂ ਫੇਲ ਹੋਣ ਵਾਲਿਆਂ ਦੀ ਡਾਰ 2.9 ਫੀਸਦੀ ਸੀ। "
ਵਿਭਾਗ ਨੇ ਦੱਸਿਆ ਕਿ ਇਸ ਦੌਰਾਨ ਟੈਸਟ ਵਿੱਚ ਫੇਲ ਹੋਣ ਵਾਲੇ 1,597 ਬਿਨੈਕਾਰਾਂ ਵਿੱਚੋਂ 5.5 ਫੀਸਦੀ 1 ਨੰਬਰ ਤੋਂ ਫੇਲ ਹੋਏ ਹਨ।
"ਇਕ ਵਿਅਕਤੀ ਨੂੰ ਇੱਕ ਦਿਨ ਵਿੱਚ ਤਿੰਨ ਵਾਰ ਟੈਸਟ ਪਾਸ ਕਰਨ ਦਾ ਮੌਕਾ ਦਿੱਤਾ ਜਾਂਦਾ ਹੈ। ਉਹ ਇਸ ਟੈਸਟ ਨੂੰ ਕਈ ਵਾਰ ਦੇ ਸਕਦੇ ਹਨ।"
