ਅਮਰੀਕਾ ਵਿੱਚ ਭਾਰਤੀ ਮੂਲ ਦੇ ਵਕੀਲ ਰਵਿੰਦਰ ਸਿੰਘ ਭੱਲਾ, ਜੋ ਕਿ ਲਗਭਗ ਤਿੰਨ ਮਹੀਨੇ ਪਹਿਲਾਂ, ਨਿਊ ਜਰਸੀ ਦੇ ਸ਼ਹਿਰ ਹੋਬੋਕਿਨ ਤੋਂ ਪਹਿਲੇ ਸਿੱਖ ਮੇਅਰ ਚੁਣੇ ਗਏ ਸਨ, ਨੇ ਮੰਨਿਆ ਹੈ ਕਿ ਉਹਨਾਂ ਅਤੇ ਉਹਨਾਂ ਦੇ ਪਰਿਵਾਰ ਨੂੰ ਜਾਨ ਤੋਂ ਮਾਰ ਦੇਣ ਵਾਲੀਆਂ ਧਮਕੀਆਂ ਮਿਲ ਰਹੀਆਂ ਹਨ। ਹਾਲ ਵਿੱਚ ਹੀ ਇਕ ਅਣਜਾਣ ਵਿਅਕਤੀ ਵਲੋਂ ਉਹਨਾਂ ਦੇ ਦਫਤਰ ਵਿੱਚ ਇੱਕ ਬੈਗ ਛੱਡ ਦਿਤਾ ਗਿਆ ਸੀ, ਜਿਸ ਵਿੱਚ ਕੁਝ ਇਤਰਾਜ ਯੋਗ ਵਸਤਾਂ ਸਨ। ਉਹਨਾਂ ਦੀ ਮੇਅਰ ਵਜੋਂ ਚੋਣ ਤੋਂ ਕੁਝ ਦਿੰਨ ਪਹਿਲਾਂ ਹੀ ਉਹਨਾਂ ਨੇ ਇਕ ਇਸ਼ਤੇਹਾਰ ਦੁਆਰਾ ਅੱਤਵਾਦ ਨਾਲ ਜੋੜਿਆ ਗਿਆ ਸੀ। ਹੋਬੋਕਿਨ ਸ਼ਹਿਰ ਦੇ ਪੁਲਿਸ ਵਿਭਾਗ ਨੇ ਕਿਹਾ ਹੈ ਕਿ ਉਹ ਇਸ ਮਸਲੇ ਨੂੰ ਬਹੁਤ ਗੰਭੀਰਤਾ ਨਾਲ ਲੈ ਰਹੇ ਹਨ, ਅਤੇ ਐਫ ਬੀ ਆਈ ਦੀ ‘ਜੋਆਇੰਟ ਟੈਰੋਰਿਜ਼ਮ ਟਾਸਕ ਫੋਰਸ’ ਨੇ ਸਿਟੀ ਹਾਲ ਦੀ ਸੁਰੱਖਿਆ ਦਾ ਜਾਇਜ਼ਾ ਵੀ ਲਿਆ ਹੈ।
ਹੋਬੋਕਿਨ ਸਿਟੀ ਕਾਂਉਸਲ ਦੀ ਅਧਿਕਾਰਤ ਵੈਬਸਾਈਟ ਉਤੇ ਇਕ ਸਟੇਟਮੈਂਟ ਵਿੱਚ ਕਿਹਾ ਗਿਆ ਹੈ ਕਿ ਪੁਲਿਸ, ਵੀਰਵਾਰ ਰਾਤ ਨੂੰ ਹੋਈ ਇਸ ਘਟਨਾਂ ਦੀ ਜਾਂਚ ਕਰ ਰਹੀ ਹੈ ਅਤੇ ਨਾਲ ਹੀ ਇਹ ਵੀ ਦਸਿਆ ਗਿਆ ਹੈ ਕਿ ਸ਼੍ਰੀ ਭੱਲਾ ਨੇ ਮੰਨਿਆ ਹੈ ਕਿ ਉਹਨਾਂ ਅਤੇ ਉਹਨਾਂ ਦੇ ਪਰਿਵਾਰ ਨੂੰ ਜਾਨ ਤੋਂ ਮਾਰਨ ਦੀਆਂ ਧਮਕੀਆਂ ਦਿੱਤੀਆਂ ਗਈਆਂ ਹਨ।
ਦਫਤਰ ਦੀ ਇਕ ਵਕਤਾ ਜੂਐਨ ਮੇਲੀ ਨੇ ਦੱਸਿਆ ਕਿ ਵੀਰਵਾਰ ਦੀ ਰਾਤ ਤਕਰੀਬਨ ਅੱਠ ਵਜੇ ਇਕ ਵਿਅਕਤੀ ਇਮਾਰਤ ਵਿੱਚ ਮੈਟਲ ਡਿਟੇਕਟਰਾਂ ਵਿੱਚੋਂ ਦੀ ਲੰਘਦਾ ਹੋਇਆ, ਵਾਸ਼ਰੂਮ ਇਸਤੇਮਾਲ ਕਰਨ ਦੀ ਇਜਾਜਤ ਨਾਲ ਵੜਿਆ ਅਤੇ ਉਸ ਨੇ ਇੱਕ ਭਰਿਆ ਹੋਇਆ ਬੈਗ ਸ਼੍ਰੀ ਭੱਲਾ ਦੇ ਸਹਾਇਕ ਦੇ ਦਫਤਰ ਵੱਲ ਸੁੱਟ ਮਾਰਿਆ।
ਬੇਸ਼ਕ ਸ਼੍ਰੀ ਭੱਲਾ ਉਸ ਸਮੇਂ ਦਫਤਰ ਵਿੱਚ ਨਹੀਂ ਸਨ, ਪਰ ਉਹ ਇਕ ਸਮਾਗਮ ਵਿੱਚ ਭਾਗ ਲੈ ਕਿ ਵਾਪਸ ਆ ਹੀ ਰਹੇ ਸਨ। ਉਹਨਾਂ ਦੇ ਡਿਪਟੀ ਚੀਫ ਆਫ ਸਟਾਫ ਜੇਸਨ ਫਰੀਮਨ ਨੇ ਉਸ ਵਿਅਕਤੀ ਨੂੰ ਬੈਗ ਸੁਟਣ ਤੋਂ ਬਾਦ ਬਾਹਰ ਵੱਲ ਭੱਜਦੇ ਹੋਏ ਦੇਖਿਆ।
ਸ਼੍ਰੀ ਭੱਲਾ ਨੇ ਕਿਹਾ ਕਿ ‘ਇਹ ਵਾਲੀ ਘਟਨਾਂ ਦੇ ਨਾਲ ਨਾਲ, ਉਹਨਾਂ ਅਤੇ ਉਹਨਾਂ ਦੇ ਪਰਿਵਾਰ ਨੂੰ ਜਾਨ ਤੋਂ ਮਾਰਨ ਦੀਆਂ ਧਮਕੀਆਂ ਬਹੁਤ ਮੰਦਭਾਗੀਆਂ ਹਨ। ਅਤੇ ਇਹ ਸਾਨੂੰ ਯਾਦ ਵੀ ਦਿਵਾ ਰਹੀਆਂ ਹਨ ਕਿ ਅਸੀਂ ਸੁਰੱਖਿਆ ਦੇ ਮਾਮਲੇ ਵਿੱਚ ਅਵੇਸਲੇ ਨਾ ਹੋਈਏ’।
ਸ਼੍ਰੀ ਭੱਲਾ ਜੋ ਕਿ ਇੱਕ ਅਟਾਰਨੀ ਦੇ ਨਾਲ ਨਾਲ ਮਾਨਵੀ ਹੱਕਾਂ ਦੇ ਕਾਰਕੁੰਨ ਵੀ ਹਨ, ਮੇਅਰ ਬਨਣ ਤੋਂ ਪਹਿਲਾਂ ਇੱਕ ਕਾਂਉਂਸਲਰ ਵਜੋਂ ਕੰਮ ਕਰ ਚੁੱਕੇ ਹਨ। ਪਰ, ਇਸ ਮੇਅਰ ਵਾਲੀ ਚੋਣ ਤੋਂ ਪਹਿਲਾਂ, ਇੱਕ ਨਿੰਦਿਆ ਕਰਨ ਵਾਲਾ ਇਸ਼ਤੇਹਾਰ, ਜਿਸ ਵਿੱਚ ਸ਼੍ਰੀ ਭੱਲਾ ਦੀ ਫੋਟੋ ਦੇ ਥੱਲੇ ‘ਇਕ ਅਤਵਾਦੀ ਨੂੰ ਸ਼ਹਿਰ ਦੀ ਵਾਗਡੋਰ ਨਾਂ ਸੋਂਪੋ’ ਲਿਖਿਆ ਹੋਇਆ ਸੀ, ਕਈ ਕਾਰਾਂ ਉੱਤੇ ਲਗਾਏ ਗਏ ਸਨ।
