ਮਹਿੰਗਾਈ ਦਰ ਵਿਚ ਆਈ ਗਿਰਾਵਟ ਕਾਰਨ ਰਿਜ਼ਰਵ ਬੈਂਕ ਔਫ ਆਸਟ੍ਰੇਲੀਆ ਉਤੇ ਅਗਲੇ ਹਫਤੇ ਬੋਰਡ ਮੀਟਿੰਗ ਵਿਚ ਵਿਆਜ ਦਰਾਂ ਨੂੰ ਵਧਾਉਣ ਦਾ ਦਬਾਅ ਘੱਟ ਹੋਇਆ ਹੈ।
ਮਾਹਿਰਾਂ ਮੁਤਾਬਕ ਵੀ ਮਹਿੰਗਾਈ ਦਰ ਵਿਚ 7.4 ਫੀਸਦੀ ਤੋਂ 6.8 ਫੀਸਦੀ ਵਿਚ ਗਿਰਾਵਟ ਦਰਜ ਕੀਤੇ ਜਾਣ ਤੋਂ ਬਾਅਦ ਰਿਜ਼ਰਵ ਬੈਂਕ ਔਫ ਆਸਟ੍ਰੇਲੀਆ ਨੂੰ ਵਿਆਜ ਦਰਾਂ ਤੇ ਵਿਰਾਮ ਲਾਉਣ ਲਈ ਸੋਚਣਾ ਚਾਹੀਦਾ ਹੈ।
ਏ ਐਮ ਪੀ ਕੈਪੀਟਲ ਦੀ ਸੀਨੀਅਰ ਅਰਥ ਸ਼ਾਸਤਰੀ ਡਾਇਨਾ ਮੌਸੀਨਾ ਨੇ ਕਿਹਾ ਕਿ, "ਮਹੀਨਾਵਾਰ ਮਹਿੰਗਾਈ ਰਿਪੋਰਟ ਅਤੇ ਰੁਜ਼ਗਾਰ ਡੇਟਾ, ਪ੍ਰਚੂਨ ਵਪਾਰ ਅਤੇ ਕਾਰੋਬਾਰ ਅਤੇ ਖਪਤਕਾਰਾਂ ਦੇ ਸਰਵੇਖਣਾਂ ਸਮੇਤ ਹੋਰ ਮੁੱਖ ਡੇਟਾ ਸਰੋਤਾਂ ਤੋਂ ਪ੍ਰਾਪਤ ਅੰਕੜਿਆਂ ਦਾ ਇਸ਼ਾਰਾ ਰਿਜ਼ਰਵ ਬੈਂਕ ਔਫ ਆਸਟ੍ਰੇਲੀਆ ਨੂੰ ਵਿਆਜ ਦਰਾਂ ਤੇ ਵਿਰਾਮ ਲਾਉਣ ਲਈ ਕਾਫ਼ੀ ਹੋਣਾ ਚਾਹੀਦਾ ਹੈ "
ਰੋਜ਼ ਦੇ ਰਹਿਣ-ਸਹਿਣ ਦੀ ਲਾਗਤ ਵਿੱਚ ਭਾਵੇ ਥੋੜੀ ਠੱਲ ਦਰਜ ਹੋਈ ਹੈ ਪਰ ਮਹਿੰਗਾਈ ਦਰ ਰਿਜ਼ਰਵ ਬੈਂਕ ਔਫ ਆਸਟ੍ਰੇਲੀਆ ਦੇ ਆਪਣੇ ਮਿਥੇ ਟੀਚੇ, ਜੋ ਕਿ ਦੋ ਤੋਂ ਤਿੰਨ ਪ੍ਰਤੀਸ਼ਤ ਵਿਚਕਾਰ ਹੈ, ਤੋਂ ਅਜੇ ਵੀ ਬਹੁਤ ਵੱਧ ਹੈ।
ਰਿਜ਼ਰਵ ਬੈਂਕ ਵਲੋਂ ਵਿਆਜ ਦਰਾਂ ਵਿਚ ਵਾਧੇ ਜਾ ਵਿਰਾਮ ਬਾਰੇ ਫੈਸਲਾ ਬੋਰਡ ਮੀਟਿੰਗ ਤੋਂ ਪਹਿਲਾਂ ਪ੍ਰਾਪਤ ਅੰਕੜਿਆਂ ਤੇ ਕਾਫ਼ੀ ਨਿਰਭਰ ਕਰੇਗਾ।
