ਆਪਣੇ ਡਰਾਈਵਰ ਲਾਇਸੈਂਸਾਂ ਦਾ ਨਵੀਨੀਕਰਨ ਕਰਨ ਵਾਲੇ ਡ੍ਰਾਈਵਰਾਂ ਦੀ ਸੜਕ ਨਿਯਮਾਂ ਦੇ ਗਿਆਨ ਲਈ ਮੁੜ ਜਾਂਚ ਕੀਤੀ ਜਾ ਸਕਦੀ ਹੈ। ਕੁਈਨਜ਼ਲੈਂਡ ਸਰਕਾਰ ਵਲੋਂ ਇਹ ਬਦਲਾਵ ਲਿਆਉਣ ਦਾ ਮੁੱਖ ਉਦੇਸ਼ ਰਾਜ ਭਰ ਵਿੱਚ ਸੜਕ ਸੁਰੱਖਿਆ ਕਾਨੂੰਨਾਂ ਨੂੰ ਮਜ਼ਬੂਤ ਕਰਨਾ ਦੱਸਿਆ ਗਿਆ ਹੈ।
ਟਰਾਂਸਪੋਰਟ ਮੰਤਰੀ ਮਾਰਕ ਬੇਲੀ ਦਾ ਕਹਿਣਾ ਹੈ ਕਿ ਸਰਕਾਰ ਇਹ ਸੁਨਿਸ਼ਚਿਤ ਕਰਨਾ ਚਾਹੁੰਦੀ ਹੈ ਕਿ ਸੜਕ ਨਿਯਮਾਂ ਵਿੱਚ ਆ ਰਹੀਆਂ ਨਵੀਆਂ ਤਬਦੀਲੀਆਂ ਤੋਂ ਡਰਾਈਵਰ ਵਾਕਿਫ਼ ਹਨ ਅਤੇ ਇਸ ਮੰਤਵ ਨੂੰ ਪੂਰਾ ਕਰਨ ਲਈ ਉਹ ਇੱਕ "ਰਿਫਰੈਸ਼ਰ ਕੋਰਸ" ਲਾਗੂ ਕਰਨ ਸਮੇਤ ਕਈ ਨਵੇਂ ਉਪਾਵਾਂ 'ਤੇ ਵਿਚਾਰ ਕਰ ਰਹੇ ਹੈ।
ਉਨ੍ਹਾਂ ਨੇ ਏ ਬੀ ਸੀ ਰੇਡੀਓ ਬ੍ਰਿਸਬੇਨ ਨੂੰ ਦੱਸਿਆ ਕਿ,"ਪੰਜ ਸਾਲ ਪਹਿਲਾਂ ਲਏ ਲਾਇਸੈਂਸ ਅਤੇ ਇਸਨੂੰ ਨਵਿਆਉਣ ਦੇ ਵਿੱਚਕਾਰ ਸੜਕ ਨਿਯਮਾਂ ਵਿੱਚ ਅਕਸਰ ਬਹੁਤ ਸਾਰੇ ਬਦਲਾਅ ਹੋਏ ਹੁੰਦੇ ਹਨ, ਜਿਸ ਬਾਰੇ ਸਾਰੇ ਡਰਾਈਵਰਾਂ ਨੂੰ ਲਾਜ਼ਮੀ ਪਤਾ ਹੋਣਾ ਚਾਹੀਦਾ ਹੈ ਅਤੇ ਇਸ ਲਈ ਇਸ ਦੀ ਅਜ਼ਮਾਇਸ਼ ਹੋਣੀ ਵੀ ਜ਼ਰੂਰੀ ਹੈ।"
ਸ੍ਰੀ ਬੇਲੀ ਨੇ ਕਿਹਾ ਕਿ ਇਨ੍ਹਾਂ ਨਵੇਂ ਨਿਯਮਾਂ ਦੇ ਬਦਲਾਵਾਂ ਦੀ ਅਜ਼ਮਾਇਸ਼ ਕਰਨ ਲਈ ਔਨਲਾਈਨ ਇਮਤਿਹਾਨ ਤੋਂ ਇਲਾਵਾ ਕਈ ਹੋਰ ਵਿਕਲਪਾਂ ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ।
ਸਰਕਾਰ ਇਸ ਬਾਰੇ ਭਾਈਚਾਰੇ ਤੋਂ ਫੀਡਬੈਕ ਲੈਣ ਬਾਰੇ ਵੀ ਵਿਚਾਰ ਕਰ ਰਹੀ ਹੈ।
