ਨਿਊ ਸਾਊਥ ਵੇਲਜ਼ ਰਾਜ ਦੇ ਕਾਨੂੰਨਾ ਤਹਿਤ ਬੱਸ ਡਰਾਈਵਰ ਦੀ ਯਾਤਰੀਆਂ ਨੂੰ ਸੀਟ ਬੈਲਟ ਪਹਿਨਣ ਲਈ ਸੁਚੇਤ ਕਰਨ ਦੀ ਜ਼ਿਮੇਵਾਰੀ ਬਣਦੀ ਹੈ।
ਹੰਟਰ ਵੈਲੀ ਵਿੱਚ ਹੋਏ ਹਾਦਸੇ ਤੋਂ ਬਾਅਦ ਪੁਲਿਸ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ ਦੁਰਘਟਨਾ ਹੋਈ ਬੱਸ ਵਿਚ ਸੀਟ ਬੈਲਟਾਂ ਫਿੱਟ ਹੋਇਆਂ ਸਨ ਪਰ ਇਸ ਬਾਰੇ ਕੋਈ ਟਿੱਪਣੀ ਨਹੀਂ ਕੀਤੀ ਕਿ ਕੀ ਯਾਤਰੀਆਂ ਨੇ ਹਾਦਸੇ ਦੇ ਸਮੇਂ ਬੈਲਟਾਂ ਪਹਿਨੀਆਂ ਹੋਇਆ ਸਨ ਜਾਂ ਨਹੀਂ। ਹਾਦਸੇ ਦੀ ਜਾਂਚ ਅਜੇ ਮੁਕੱਮਲ ਨਹੀਂ ਹੋਈ ਹੈ।
ਨਿਊ ਸਾਊਥ ਵੇਲਜ਼ ਰਾਜ ਦੇ ਪ੍ਰੀਮੀਅਰ ਕ੍ਰਿਸ ਮਿਨਸ ਨੇ ਕਿਹਾ ਹੈ ਕਾਨੂੰਨੀ ਤੌਰ 'ਤੇ ਜੇ ਬੱਸ ਵਿਚ ਸੀਟਬੈਲਟ ਫਿੱਟ ਹੁੰਦੀ ਹੈ ਤਾਂ ਇਸ ਨੂੰ ਪਾਉਣਾ ਲਾਜ਼ਮੀ ਹੈ ਪਰ ਸ਼ਹਿਰ ਵਿਚ ਨਿਯਮਤ ਜਨਤਕ ਆਵਾਜਾਈ ਰੂਟਾਂ 'ਤੇ ਬੱਸਾਂ ਆਮ ਤੌਰ 'ਤੇ ਸੀਟਬੈਲਟ ਨਾਲ ਲੈਸ ਨਹੀਂ ਹੁੰਦੀਆਂ ਹਨ।
ਮਾਰਚ 2022 ਵਿੱਚ ਨਿਊ ਸਾਊਥ ਵੇਲਜ਼ ਸਰਕਾਰ ਨੇ ਕਿਹਾ ਕਿ ਰਾਜ ਵਿੱਚ ਪੇਂਡੂ ਅਤੇ ਖੇਤਰੀ ਬੱਸ ਕੰਟਰੈਕਟ 'ਤੇ ਸਾਰੀਆਂ ਸਮਰਪਿਤ ਸਕੂਲੀ ਬੱਸਾਂ ਵਿਚ ਸੀਟ ਬੈਲਟਾਂ ਫਿੱਟ ਹੋ ਚੁੱਕੀਆਂ ਹਨ।
ਮਈ ਵਿੱਚ ਆਇਨਸਬਰੀ ਵਿੱਚ ਐਕਸਫੋਰਡ ਪ੍ਰਾਇਮਰੀ ਸਕੂਲ ਦੇ 46 ਬੱਚਿਆਂ ਨੂੰ ਲੈ ਕੇ ਜਾ ਰਹੀ ਬੱਸ ਨਾਲ ਇੱਕ ਟਰੱਕ ਦੀ ਟੱਕਰ ਤੋਂ ਬਾਅਦ ਵਿਕਟੋਰੀਆ ਦੇ ਪ੍ਰੀਮੀਅਰ ਡੈਨੀਅਲ ਐਂਡਰਿਊਜ਼ ਨੇ ਵੀ ਕਿਹਾ ਹੈ ਕਿ ਸਰਕਾਰ ਬੱਸਾਂ ਵਿੱਚ ਸੀਟ ਬੈਲਟ ਲਾਜ਼ਮੀ ਕਰਨ ਬਾਰੇ ਵਿਚਾਰ ਕਰ ਰਹੀ ਹੈ।
