ਜ਼ੂਮ ਵਰਗੀ ਕੰਪਨੀ, ਜੋ ਸਟਾਫ ਨੂੰ ਘਰ ਤੋਂ ਕੰਮ ਕਰਨ ਦੇ ਯੋਗ ਬਣਾਉਣ ਵਿੱਚ ਸਭ ਤੋਂ ਮੋਹਰੀ ਸੀ, ਨੇ ਆਪਣੇ ਕਰਮਚਾਰੀਆਂ ਨੂੰ ਦਫ਼ਤਰ ਵਾਪਸ ਆਉਣ ਦੇ ਆਦੇਸ਼ ਜਾਰੀ ਕੀਤੇ ਹਨ। ਇਸ ਤੋਂ ਪਹਿਲਾਂ ਡਿਜ਼ਨੀ, ਐਮਾਜ਼ਾਨ ਅਤੇ ਕਈ ਹੋਰ ਵੱਡੀਆਂ ਤਕਨੀਕੀ ਕੰਪਨੀਆਂ ਜਿਨ੍ਹਾਂ ਵਿੱਚ ਟਵਿੱਟਰ - ਜਿਸਨੂੰ ਹੁਣ X ਕਿਹਾ ਜਾਂਦਾ ਹੈ, ਨੇ ਵੀ ਆਪਣੇ ਕਰਮਚਾਰੀਆਂ ਨੂੰ ਦਫ਼ਤਰ ਆ ਕੇ ਕੰਮ ਕਰਨ ਲਈ ਆਖਿਆ ਸੀ।
ਕੋਈ ਵੀ ਵਿਅਕਤੀ ਘਰ ਤੋਂ ਕੰਮ ਕਰਨ ਲਈ ਆਪਣੇ ਰੋਜ਼ਗਾਰਦਾਤਾ ਨੂੰ ਅਰਜ਼ੀ ਦੇ ਸਕਦਾ ਹੈ ਪਰ ਆਸਟ੍ਰੇਲੀਅਨ ਫੇਅਰ ਵਰਕ ਓਮਬਡਸਮੈਨ ਅਨੁਸਾਰ ਕਰਮਚਾਰੀਆਂ ਦੀਆਂ ਕੁਝ ਸ਼੍ਰੇਣੀਆਂ ਨੂੰ ਘਰੋਂ ਕੰਮ ਕਰਨ ਦੇ ਕਾਨੂੰਨੀ ਅਧਿਕਾਰ ਹੈ।
ਇਨ੍ਹਾਂ ਵਿਚ ਉਹ ਲੋਕ ਸ਼ਾਮਲ ਹਨ ਜਿਨ੍ਹਾਂ ਉੱਤੇ ਕਿਸੇ ਦੀ ਦੇਖਭਾਲ ਦੀਆਂ ਜ਼ਿੰਮੇਵਾਰੀਆਂ ਹਨ ਜਾਂ ਉਹ ਜਿਨ੍ਹਾਂ ਨੂੰ ਅਪਾਹਜਤਾ ਕਰਕੇ ਪ੍ਰੇਸ਼ਾਨੀ ਹੋ ਰਹੀ ਹੈ ਅਤੇ ਜਾਂ ਉਹ ਜਿਨ੍ਹਾਂ ਨੂੰ ਆਪ ਘਰੇਲੂ ਹਿੰਸਾ ਦਾ ਅਨੁਭਵ ਕਰਨਾ ਪੈ ਰਿਹਾ ਹੈ ਜਾਂ ਉਹ ਇਸ ਹਿੰਸਾ ਦੇ ਕਿਸੇ ਸ਼ਿਕਾਰ ਨੂੰ ਸਹਾਰਾ ਦੇ ਰਹੇ ਹਨ।
ਕੋਈ ਵੀ ਸਥਾਈ ਜਾ 'ਕੈਜ਼ੂਅਲ' ਕਰਮਚਾਰੀ ਜਿਸ ਨੇ ਘੱਟੋ-ਘੱਟ ਇੱਕ ਸਾਲ ਲਈ ਆਪਣੇ ਰੁਜ਼ਗਾਰਦਾਤਾ ਨਾਲ ਕੰਮ ਕੀਤਾ ਹੈ ਨੂੰ ਇਹ ਕਾਨੂੰਨੀ ਅਧੀਕਾਰ ਦਿੱਤੇ ਗਏ ਹਨ ਪਰ ਰੁਜ਼ਗਾਰਦਾਤਾ ਵਾਜਬ ਵਪਾਰਕ ਆਧਾਰਾਂ ਤਹਿਤ ਇਨ੍ਹਾਂ ਬੇਨਤੀਆਂ ਨੂੰ ਅਸਵੀਕਾਰ ਕਰ ਸਕਦੇ ਹਨ।
