ਹੈਨਲੀ ਪਾਸਪੋਰਟ ਇੰਡੈਕਸ ਦੇ ਅਨੁਸਾਰ ਆਸਟ੍ਰੇਲੀਅਨ ਪਾਸਪੋਰਟ ਇਸ ਸਾਲ ਵਿਸ਼ਵ ਦੇ ਸਭ ਤੋਂ ਸ਼ਕਤੀਸ਼ਾਲੀ ਪਾਸਪੋਰਟਾਂ ਦੀ ਸੂਚੀ ਵਿੱਚ ਅੱਠਵੇਂ ਸਥਾਨ ਤੇ ਹੈ ਜਦਕਿ ਦੁਨਿਆਂ ਦਾ ਸੱਬ ਤੋ ਸ਼ਕਤੀਸ਼ਾਲੀ ਪਾਸਪੋਰਟ ਹੋਣ ਦਾ ਮਾਣ ਜਪਾਨ ਨੂੰ ਮਿਲਿਆ ਹੈ।
ਲੰਡਨ ਵਿਚ ਸਥਿਤ ਇਕ ਗਲੋਬਲ ਨਾਗਰਿਕਤਾ ਅਤੇ ਨਿਵਾਸ ਸਲਾਹਕਾਰ ਸੰਸਥਾ ਹੈਨਲੀ ਐਂਡ ਪਾਰਟਨਰਸ ਨੇ ਦੁਨੀਆ ਦੇ ਪਾਸਪੋਰਟਾਂ ਦੀ ਰੈਂਕਿੰਗ ਵੀਜ਼ਾ ਤੋਂ ਬਿਨਾਂ ਸੱਭ ਤੋਂ ਜ਼ਿਆਦਾ ਮੁਲਕਾਂ ਦੀ ਯਾਤਰਾ ਕਰਣ ਤੇ ਅਧਾਰਿਤ ਕੀਤੀ ਹੈ।
ਜਪਾਨ ਦੇ ਪਾਸਪੋਰਟ ਤੇ 191 ਦੇਸ਼ਾਂ ਦੀ ਯਾਤਰਾ ਵੀਜ਼ੇ ਬਗੈਰ ਕੀਤੀ ਜਾ ਸੱਕਦੀ ਹੈ ਜਦਕਿ ਸਿੰਗਾਪੁਰ ਦੇ ਪਾਸਪੋਰਟ ਧਾਰਕ ਬਿਨਾਂ ਪੂਰਤੀ ਵੀਜ਼ਾ ਦੇ 190 ਦੇਸ਼ਾਂ ਦੀ ਯਾਤਰਾ ਕਰ ਸਕਦੇ ਹਨ।
ਆਸਟ੍ਰੇਲੀਅਨ ਪਾਸਪੋਰਟ ਆਪਣੇ ਧਾਰਕਾਂ ਨੂੰ 184 ਦੇਸ਼ਾਂ ਦੀ ਵੀਜ਼ੇ ਬਗੈਰ ਯਾਤਰਾ ਕਰਨ ਦੀ ਆਗਿਆ ਦਿੰਦਾ ਹੈ। ਇਹ ਜਾਰੀ ਕੀਤੀ ਸੂਚੀ ਵਿੱਚ ਚੈੱਕ ਗਣਰਾਜ, ਗ੍ਰੀਸ ਅਤੇ ਮਾਲਟਾ ਨਾਲ ਅੱਠਵੇਂ ਸਥਾਨ ਤੇ ਹੈ।
ਵੀਜ਼ਾ ਮੁਕਤ ਅੰਕ ਵਿੱਚ ਕੋਈ ਤਬਦੀਲੀ ਨਾ ਹੋਣ ਦੇ ਬਾਵਜੂਦ ਭਾਰਤੀ ਪਾਸਪੋਰਟ ਇਕ ਸਥਾਨ ਗਵਾ ਬੈਠਾ ਹੈ। ਇਹ ਤਾਜਿਕਿਸਤਾਨ ਨਾਲ 85 ਵੇਂ ਸਥਾਨ 'ਤੇ ਹੈ। ਭਾਰਤੀ ਪਾਸਪੋਰਟ ਤੇ ਧਾਰਕਾਂ ਨੂੰ 58 ਦੇਸ਼ਾਂ ਨੂੰ ਵੀਜ਼ਾ ਮੁਕਤ ਯਾਤਰਾ ਕਰਣ ਦੀ ਅਨੁਮਤੀ ਹੈ।
2020 ਵਿੱਚ ਭਾਰਤੀ ਪਾਸਪੋਰਟ ਤਾਜਿਕਸਤਾਨ ਅਤੇ ਮੌਰੀਤਾਨੀਆ ਦੇ ਨਾਲ ਸੂਚੀ ਵਿੱਚ 84 ਵੇਂ ਨੰਬਰ 'ਤੇ ਸੀ।
ਇੰਡੈਕਸ ਦੇ ਅਨੁਸਾਰ ਜਾਪਾਨ, ਸਿੰਗਾਪੁਰ, ਦੱਖਣੀ ਕੋਰੀਆ, ਜਰਮਨੀ, ਇਟਲੀ, ਫਿਨਲੈਂਡ, ਸਪੇਨ, ਲਕਸਮਬਰਗ, ਡੈਨਮਾਰਕ ਅਤੇ ਆਸਟਰੀਆ ਇਸ ਵੇਲ਼ੇ ਦੁਨਿਆਂ ਦੇ ਚੋਟੀ ਦੇ 10 ਪਾਸਪੋਰਟ ਹਨ।
ਸੋਮਵਾਰ ਤੋਂ ਸ਼ੁੱਕਰਵਾਰ ਰਾਤ 9 ਵਜੇ ਐਸ ਬੀ ਐਸ ਪੰਜਾਬੀ ਦਾ ਪ੍ਰੋਗਾਮ ਸੁਣੋ ਅਤੇ ਸਾਨੂੰ ਫੇਸਬੁੱਕ ਉੱਤੇ ਵੀ ਫਾਲੋ ਕਰੋ।
