ਭਾਰਤ ਦੀ ਕੌਮੀ ਨਸ਼ਾ ਵਿਰੋਧੀ ਏਜੇਂਸੀ ਨੇ ਬੀਤੇ ਹਫਤੇ ਇੱਕ ਕੌਮਾਂਤਰੀ ਨਸ਼ਾ ਤਸਕਰੀ ਗਿਰੋਹ ਦੇ ਮੈਂਬਰਾਂ ਨੂੰ ਗ੍ਰਿਫਤਾਰ ਕਰਨ ਦਾ ਦਾਅਵਾ ਕੀਤਾ ਹੈ ਜੋ ਕਿ ਹੋਰਨਾਂ ਦੇਸ਼ਾਂ ਤੋਂ ਅਲਾਵਾ ਆਸਟ੍ਰੇਲੀਆ ਵਿੱਚ ਨਸ਼ਾ ਤਸਕਰੀ ਵਿੱਚ ਕਥਿਤ ਤੌਰ ਤੇ ਸ਼ਾਮਲ ਸਨ।
ਨਾਰਕੋਟਿਕਸ ਕੰਟਰੋਲ ਬਿਊਰੋ ਵੱਲੋਂ ਫੜੇ ਕਥਿਤ ਦੋਸ਼ੀਆਂ ਵਿੱਚ ਪੰਜ ਭਾਰਤੀ, ਦੋ ਨਾਇਜੀਰਿਅਨ, ਇੱਕ ਅਮਰੀਕੀ ਅਤੇ ਇੱਕ ਇੰਡੋਨੇਸ਼ੀਆ ਦੇ ਨਾਗਰਿਕ ਸ਼ਾਮਲ ਹਨ। ਦੱਸਿਆ ਗਿਆ ਹੈ ਕਿ ਇਹ ਵਿਅਕਤੀ ਜਿਸ ਗਿਰੋਹ ਨਾਲ ਸਬੰਧਤ ਹਨ ਉਹ ਬੀਤੇ ਜੂਨ ਮਹੀਨੇ ਵਿੱਚ ਭਾਰਤ ਤੋਂ 55 ਕਿਲੋ ਕੋਕੇਨ ਆਸਟ੍ਰੇਲੀਆ ਭੇਜਣ ਲਈ ਜਿੰਮੇਦਾਰ ਸੀ।
ਇੱਕ ਭਾਰੀ ਮਸ਼ੀਨਰੀ ਵਿੱਚ ਲਕੋ ਕੇ ਸਮੁੰਦਰ ਦੇ ਰਾਹੀਂ ਭੇਜਿਆ $20 ਮਿਲੀਅਨ ਦਾ ਨਸ਼ਾ ਆਸਟ੍ਰੇਲੀਆ ਦੀ ਬਾਰਡਰ ਫੋਰਸ ਵੱਲੋਂ ਬਰਾਮਦ ਕਰ ਲਿਆ ਗਿਆ ਅਤੇ ਇਸ ਸਬੰਧ ਵਿੱਚ ਤਿੰਨ ਸਿਡਨੀ ਨਿਵਾਸੀਆਂ ਨੂੰ ਗ੍ਰਿਫਤਾਰ ਵੀ ਕੀਤਾ ਗਿਆ।
ਭਾਰਤ ਦੇ ਨਾਰਕੋਟਿਕਸ ਕੰਟਰੋਲ ਬਿਊਰੋ ਦੇ ਡਿਪਟੀ ਨਿਰਦੇਸ਼ਕ ਐਸ ਕੇ ਝਾਅ ਨੇ ਦੱਸਿਆ ਕਿ ਆਸਟ੍ਰੇਲੀਆ ਭੇਜਣ ਤੋਂ ਪਹਿਲਾਂ ਨਸ਼ੇ ਨੂੰ ਉੱਤਰਾਖੰਡ ਦੇ ਰੁਦਰਪੁਰ ਵਿੱਚ ਇੱਕ ਮਸ਼ੀਨ ਵਿੱਚ ਪੈਕ ਕੀਤਾ ਗਿਆ, ਫੇਰ ਉਸਨੂੰ ਗਾਜ਼ੀਆਬਾਦ ਦੇ ਰਾਹੀਂ ਮੁੰਬਈ ਬੰਦਰਗਾਹ ਭੇਜਿਆ ਗਿਆ ਜਿਥੋਂ ਕੇਲੋਂਗ ਹੋ ਕੇ ਇੱਕ ਸ਼ਿਪਿੰਗ ਕੰਟੇਨਰ ਵਿੱਚ ਮਸ਼ੀਨ ਨੂੰ ਇੱਕ ਕੰਪਨੀ ਦੇ ਜ਼ਰੀਏ ਸਿਡਨੀ ਰਵਾਨਾ ਕੀਤਾ ਗਿਆ।
ਸ਼੍ਰੀ ਝਾਅ ਨੇ ਕਿਹਾ ਕਿ ਇਸ ਮਾਮਲੇ ਵਿੱਚ ਪਹਿਲਾਂ ਇੱਕ ਭਾਰਤੀ ਨਾਗਰਿਕ ਨੂੰ ਗ੍ਰਿਫਤਾਰ ਕੀਤਾ ਗਿਆ ਸੀ ਜੋ ਕਿ ਦੱਸ ਸਾਲ ਆਸਟ੍ਰੇਲੀਆ ਵਿੱਚ ਰਹਿ ਚੁੱਕਿਆ ਹੈ ਅਤੇ ਉਸ ਨੇ ਕਥਿਤ ਤੌਰ ਤੇ ਆਸਟ੍ਰੇਲੀਆ ਵਿੱਚ ਆਪਣੇ ਸਬੰਧਾਂ ਰਾਹੀਂ ਤਸਕਰੀ ਦੀ ਇਸ ਘਟਨਾ ਨੂੰ ਨੇਪਰੇ ਚਾੜ੍ਹਨ ਦੀ ਕੋਸ਼ਿਸ਼ ਕੀਤੀ ਸੀ।
ਓਹਨਾ ਇਹ ਵੀ ਦੱਸਿਆ ਕਿ ਇਸ ਕਥਿਤ ਗਿਰੋਹ ਦਾ ਸਰਗਨਾ ਪੰਜਾਬੀ ਮੂਲ ਦਾ ਇੱਕ ਕੈਨੇਡੀਅਨ ਨਾਗਰਿਕ ਹੈ ਜੋ ਗਿਰੋਹ ਦੇ ਕਈ ਹੋਰ ਮੈਂਬਰਾਂ ਸਮੇਤ ਕੈਨੇਡਾ ਰਹਿੰਦਾ ਹੈ ਅਤੇ ਪਹਿਲਾਂ ਵੀ ਪੰਜਾਬ ਵਿੱਚ ਉਸ ਵਿਰੁੱਧ ਨਸ਼ਾ ਤਸਕਰੀ ਦੇ ਮਾਮਲੇ ਚੱਲ ਰਹੇ ਹਨ।
Listen to SBS Punjabi Monday to Friday at 9 pm. Follow us on Facebook and Twitter.
